साँकेतिक तस्बिर
काठमाडौं । पोर्चुगलमा आफ्नै साथीले छुरा प्रहार गर्दा १ जना नेपाली युवकको ज्यान गएको छ । छुरा प्रहारबाट कुश्मा नपा–१३, खौला, पर्वतका ३६ वर्षीय धनबहादुर क्षेत्रीको ज्यान गएको हो ।
छुरा प्रहारबाट गम्भीर घाइते भएका क्षेत्रीको उपचारका क्रममा निधन भएको थियो । क्षेत्रीको शान्तियागोस्थित लिटरोल अलेन्टेजानो अस्पतालमा उपचारका क्रममा बिहीबार निधन भएको गैरआवासीय नेपाली सङ्घ पोर्चुगलका अध्यक्ष उमेश खड्काले बताए ।
मृतक क्षेत्रीको शव अहिले परीक्षणका लागि सोही अस्पतालको शवगृहमा राखिएको छ । क्षेत्रीको निधनको बारेमा उनको परिवारलाई समेत जानकारी गराइएको खड्काले बताए ।
पोर्चुगलको ओडिमिरास्थित बोआभिस्ता बस्दै आएका क्षेत्रीलाई उनीसँगै बस्दै आएका पुतलीबजार–१२ पेल्काचौरका ३० वर्षीय लोकेन्द्र गुरुङले गत मङ्गलबार राति छुरा प्रहार गरेका थिए । मदिराले मातेका गुरुङले क्षेत्रीलाई छुरा प्रहार गरेको पोर्चुगलस्थित अवैतनिक वाणिज्यदूत मकरबहादुर हमालले जानकारी दिए ।
छुरा प्रहार गरी फरार भएका गुरुङलाई प्रहरीले पक्राउ गरी अनुसन्धान गरिरहेको छ । क्षेत्री र गुरुङ वैदेशिक रोजगारीका सिलसिलामा ८ महिना अघि पोर्चुगल पुगेका थिए । उनीहरु दुवै जना ओडिमिरास्थित एक कृषि कम्पनीमा कार्यरत थिए ।