गोरखा । गोरखामा आगलागी परेर एक घर जलेर पूर्ण रुपमा नष्ट भएको छ । भीमसेन थापा गाउँपालिका–६ को अश्राङ ठाँटी बजारमा स्थानीयबासी राजेश थापामगरको घरमा आज विद्युत सट भएर आगलागी भएको वडाध्यक्ष रन्जन रिमालले जानकारी दिए ।
शुक्रबार बिहान करिब १० बजे घरमा कोहीपनि नभएको समयमा एक्कासी आगलागी भएको उनको बताए । ‘‘आगलागीबाट घर भित्र रहेका अन्नपात, लत्ताकपडा, भाडाकुडा लगायत सवै सामाग्री जलेर नष्ट भएको छ, उनले भने, ‘‘आगो दनदनी बलेपछि भित्रबाट कुनै सामान निकाल्न सक्ने अवस्था नै रहेन ।’’
आगलागीबाट करिब ८ लाख भन्दाबढीको क्षति भएको अनुमान गरिएको उनले बताए । ‘‘आगलागीको जानकारी प्राप्त भएलगत्तै विद्युत प्राधिकरणलाई लाइन काट्न लगाएर करिब २ घण्टापछि मात्र आगो नियन्त्रणमा आएको थियो’, वडाध्यक्ष रिमालले भने, ‘‘नजिक चण्डीथानमा जात्रा हेर्न गएका स्थानीबासीहरु घटना लगत्तै जम्मा भएर आगो नियन्त्रणमा लिन सफल भयौं ।’’
आगलागीबाट थापामगरको भुकम्पपछि निर्माण गरिएको तीनकोठे घर जलेर पूर्ण रुपमा नष्ट भएको छ । घरमा तरकारी खेतीका गर्नका लागि टनेल निर्माण गर्न भनेर राखिएका निर्माणका समाग्रीहरु समेत जलेर नष्ट भएको छ ।
आगलागीबाट कुनै पनि मानवीय क्षति हुन पाएन, वडाध्यक्ष रिमालले भने, ‘‘भुकम्पपछि निर्माण गरेको घर आगलागीबाट ध्वस्त भएको छ ।’’ आगो तत्काल नियन्त्रणमा लिन सकिएका कारण वरपरको घर क्षति हुनबाट जोगिएको छ ।
