काठमाडौं । भोलि आइतबार क्रिकेट विश्व कपको फाइनल खेल हुँदैछ । भारतको अहमदाबादमा हुने फाइनल खेलमा भारतको राष्ट्रिय टिम र अष्ट्रेलियाको राष्ट्रिय टिम प्रतिष्पर्धा गर्दैछन् ।
विश्वकपको फाइनल आइतबार दिउँसो २ बजेदेखि अहमदाबादको नरेन्द्र मोदी स्टेडियममा हुनेछ । अहमदाबाद र वरपरका शहरहरूमा छ तारे, पाँच तारे र तीन तारेसम्मका सुविधाजनक होटलहरु बूक भैसकेको छ । अरु स्तरका होटलहरूमा पनि कोठाको माग आकाशिएको छ ।
क्रिकेटको यो क्रेज यति बलियो छ कि आइतबार रातिको लागि शीर्ष छ तारे होटलहरूको कोठा भाडा १ लाखसम्म पुगेको छ । समर्थकहरुले भारतको जीतका लागि प्रयागराज, मुम्बई, अहमदाबादमा पूजाअर्चना सहित यज्ञहवन गरेर प्रार्थना गरिरहेका छन् ।
रेलवेले दिल्ली र मुम्बईदेखि अहमदाबादसम्म विशेष ट्रेनहरू चलाउने घोषणा समेत गरीएको छ । फाइनल खेल हेर्न भारतीय प्रधानमन्त्री नरेन्द्र मोदी र अष्ट्रेलियाका उपप्रधानमन्त्री तथा रक्षामन्त्री रिचर्ड मार्ल्स पनि उपस्थित हुनेछन् ।
खेल अघि एयर शो हुने
फाइनल खेलअघि भारतीय वायुसेनाले एयर शो आयोजना गर्ने भएको छ । भारतीय वायुसेनाको एरोबेटिक टोली सूर्यकिरणले शुक्रबार र शनिबार रिहर्सल गरेको थियो । यो शो खेल हुनुभन्दा करिब ९ मिनेट अघिसम्म चल्नेछ ।
फेडरेशन अफ होटल एण्ड रेष्टुरेन्ट एसोसिएसन अफ गुजरातका अध्यक्ष नरेन्द्र सोमानीका अनुसार दुबई, अष्ट्रेलिया, दक्षिण अफ्रिकाका फ्यानहरू पनि अहमदाबाद उत्रिसकेका छन् । शहरका तीन र पाँचतारे होटलमा ६ हजार ९०० कोठा छन् । गुजरातमा हजारौं कोठा छन् ।
खेल हेर्न भारतबाहिरबाट २ हजार दर्शक आउने अपेक्षा गरिएको छ । जसका कारण छ तारे होटलमा कोठा भाडा १ हजारको सट्टा साढे २ लाख रुपैयाँसम्म पुगेको छ ।
रेलवे बाहेक, एयरलाइन्स कम्पनीहरूले पनि अहमदाबादको लागि थप उडानहरूको व्यवस्था गरेका छन् । त्यहाँ मुम्बई र अहमदाबाद बीच दैनिक उडानहरू छन् । फाइनल खेलका कारण उडानको संख्या उत्कर्षमा पुगेको छ ।
शनिबार र आइतवार अहमदाबाद एयरपोर्टमा ८० भन्दा बढी चार्टर्ड विमानहरू अवतरण गर्न सक्ने बताइएको छ । अहमदाबाद एयरपोर्टको क्षमता चार्टर्ड प्लेनको पार्किङका लागि मात्रै छ । यस्तो अवस्थामा गान्धीनगर र वडोदरामा धेरै प्लेन पार्किङ हुनेछन् भने इन्डियन एयरलाइन्स र सेलिब्रेटीका चार्टर्ड प्लेनलाई पनि सुरत, राजकोटमा पार्किङको सुविधा दिइएको छ ।
भारतीय कप्तान एमएस धोनी र कपिल देव पनि खेल हेर्न अहमदाबाद पुग्नेछन् । कपिल देवको कप्तानीमा भारतले पहिलो एकदिवसीय विश्वकप जितेको थियो । त्यसपछि महेन्द्र सिंह धोनीको कप्तानीमा भारतले दोस्रो पटक विश्वकपको उपाधि जितेको थियो ।