गोरखा । गोरखामा बितेको ४ महिनामा साना तथा ठुला गरी ३ हजारभन्दा बढी सवारी साधान कारवाहीमा परेका छन् । जिल्ला ट्राफिक प्रहरी कार्यालय गोरखाले उपलब्ध गराएको तथ्यांक अनुसार साउनदेखी कार्तिक मसान्तसम्ममा ३ हजार २५० वटा सवारी साधान कारवाहीमा परेको जनाएको छ ।
कार्यालय प्रमुख प्रहरी नायव निरिक्षक वेदनाथ भण्डारीले सबैभन्दा बढी दुई पाग्रे सवारी साधान कारवाहीमा परेका बताए । उनका अनुसार १ हजार ६७१ वटा मोटरसाइकल कारवाहीमा परेको छ । जसबाट १२ लाख ४३ हजार ५०० रुपैयाँ राजश्व संकलन भएको छ ।
कारवाहीमा परेका अधिकांश सवारी साधानहरु बिना कागजपत्र सवारी चलाउनेदेखी निजि सवारी साधानले भाडा असुलेर क्षमताभन्दा बढी यात्रु लिएर यात्रा गराएकाहरु कारवाहीमा परेको प्रमुख भण्डारीले जानकारी दिए ।
त्यस्तैगरी, ७६७ वटा कार तथा जिप, ४४९ वटा ट्रक तथा टिप्पर, १८६ वटा बस, १७६ वटा ट्याक्टर र अन्य १ सवारी साधान कारवाहीमा परेको कार्यालयले जनाएको छ ।
कारवाहीमा परेकामध्ये कार तथा जिपबाट ५ लाख ८२ हजार ५०० रुपैयाँ, ट्रक तथा टिप्परबाट ३ लाख ३२ हजार, बसबाट १ लाख १४ हजार, ट्याक्टरबाट १ लाख २८ हजार ५०० रुपैयाँ र अन्य १ सवारीबाट ५०० रुपैयाँ गरी कुल २४ लाख १ हजार राजश्व संकलन भएको पनि कार्यालयले जानकारी दिएको छ ।
तस्बिर : जिल्ला ट्राफिक प्रहरी कार्यालय गोरखा