काठमाडौं । चार देश सम्मिलित टि–२० शृङ्खलाअन्तर्गत आज भएको खेलमा नेपाल हङकङसँग पराजित भएको छ । हङकङ क्रिकेट क्लबको मैदानमा भएको खेलमा नेपाल हङकङसँग ९ विकेटले पराजित भएको हो ।
नेपालले दिएको ५७ रनको लक्ष्य हङकङले नौ ओभरमै १ विकेट गुमाउँदै पूरा गर्यो । यस हारसँगै नेपालको फाइन खेल्ने सपना समाप्त भएको छ ।
नेपाललाई पराजित गरेसँगै लगातार २ जित निकालेको हङकङ भने प्रतियोगिताको फाइनलमा पुग्न सफल भएको छ । त्यस्तै समान २ जित निकालेको तान्जेनिया पनि फाइनलमा पुगेको छ ।
हङकङको जितमा नताशा मिलेसले सर्वाधिक ३० रनको योगदान दिइन् । उनले २३ बल खेल्दै ४ चौकाको मद्दतमा ३० रनको योगदान दिएकी हुन । त्यस्तैगरी, शानजिन शहजादले २० रन बनाइन् । मारिको हिलले ५ रन जोडिन् ।
त्यसअघि टस जितेर पहिला ब्याटिङ गरेको नेपाल १८ ओभरमा सबै विकेट गुमाउँदै ५६ रनको योगफल बनाएको थियो । खराब ब्याटिङ गरेको नेपालको लागि रविना क्षेत्रीले सर्वाधिक २५ रन बनाइन् । उनले ३० बलमा ४ चौकाको मद्दतमा २५ रन बनाएकी हुन् । रविनाबाहेक अन्य खेलाडीले दोहोरो अङ्कमा रन जोड्न सकेनन् ।
त्यसैगरी सीता रानामगरले ९ रन जोडिन भने रोमा थापाले ७ रन बनाइन् । नेपालले ५ रनको कूल स्कोर जोड्दा ४ विकेट गुमाएको थियो । नेपालले पहिलो विकेटका रुपमा ओपनर पूजा महतोलाई गुमाएको थियो । पूजा ८ बलमा ४ रन जोड्दै आउट भएकी हुन् । सम्झना खड्कालाई नेपालले दोस्रो विकेटको रूपमा गुमायो । उनी १ रन जोड्दै आउट भएकी हुन् ।
तेस्रो विकेटका रूपमा नेपालले काजल श्रेष्ठलाई गुमाएको थियो । उनी रनको खाता नै नखोली पेभिलियन फर्किइन् । चौथो नम्बरमा ब्याटिङ समाल्न आएकी नेपाली टोलीकी कप्तान इन्दू बर्मा पनि शून्य रनमै आउट भइन् ।
बलिङतर्फ हङकङकी लक्रा साहरले ३ विकेट लिइन् भने रुचिथा भेनकातेसले २ विकेट झारिन । त्यस्तै बेटृी चान, मरिको हिल र करि चानले समान १–१ विकेट लिए ।
अब नेपालले मङ्सिर २ गते जापानसँग खेल्नेछ ।