काठमाडौं । चार देश सम्मिलित टि–२० सिरिजअन्तर्गत नेपालले आज आफ्नो दोस्रो खेल हङकङसंग खेल्दैछ । खेल बिहान ११ः४५ बजे सुरु हुने छ ।
पहिलो खेलमा पराजित नेपाल आजको खेल जित्नैपर्ने दबाबमा छ । पहिलो खेलमा बुधबार जापानलाई पराजित गरेको हङकङले आजको खेल जितेमा उपाधि भिडन्त पक्का गर्ने छ ।
समूह चरणको अर्को खेल भने बिहान ७ः१५ बजे जापान र तान्जानियाबीच भएकाे थियाे । टस जितेर जापानले पहिला फिल्डिङ रोजेको छ ।
नेपाल पहिलो खेलमा बुधबार तान्जानियासित २७ रनले पराजित भएको थियो । तान्जानियाले पहिला ब्याटिङ गर्दै निर्धारित २० ओभरमा ७ विकेट गुमाएर ११५ रन बनाएको थियो ।
हङकङमा जारी सिरिजमा आयोजक हङ्कङसँगै नेपाल, तान्जानिया र जापान सहभागी छन् । आइसिसी बरियतामा तान्जानिया १९औँ स्थानमा छ भने नेपाल २१औँ स्थानमा छ ।
त्यस्तैगरी, बरियतामा हङकङ २२औँ तथा जापान ५१औँ स्थानमा रहेको छ । नेपालले समूह चरणको अन्तिम खेल आगामी मङ्सिर २ गते जापानसित खेल्ने छ । शीर्ष २ टोलीले उपाधिका लागि खेल्ने छन् ।