पोखरा । पोखरा महानगरपालिका–१३ स्थित केवलकार मनकामना नर्सरीका रजिता गुरुङलाई फूल बेच्न भ्याई नभ्याई छ । यमपञ्चक सुरु भएदेखि नै उहाँको व्यस्तता बढेको हो ।
रजिताको नर्सरीमा फूल किन्ने पुरानै ग्राहकको भीड छ । भाइटीकाको अघिल्लो दिनभन्दा आज उनी बिहानैदेखि व्यस्त छन् । “मेरोमा पुरानै ग्राहकको भीड हुन्छ । तिहार सुरु भएदेखि नै फूल किन्नेहरू आइरहनुहुन्छ,” रजिताले भने, “अझै आज र भोलि त निकै ब्यस्त भइन्छ ।” अघिल्ला वर्षमा जस्तै यो वर्ष पनि उनले ४ हजार ५०० सयपत्री फूलको विरुवा लगाउनुभएकी थिइन ।
रजिताले फूलको खेती सुरु गरेको ८ वर्ष भयो । विसं २०७३ मा गोरखाबाट पोखरा आएर नर्सरी चलाएदेखि नै उनले तिहारका लागि सयपत्री फूल रोप्न थालेको हो । “सुरुमा नर्सरी खोलियो अनि तिहारमा सयपत्री फूल लगाउन थालेको हुँ,” उनले भने, “यो मौषमी फूल हो । तिहारमा अरु फूलभन्दा यही बढी बिक्री हुन्छ ।”
रजिताले सयपत्रीको प्रतिथुङ्गा ५ रुपैयाँमा बिक्री गरेकी छिन् । टीकाका दिनसम्म आफ्नोमा भएको सबै फूल बिक्री हुनेमा रजिता विश्वस्त छ । “पहिला पनि फूल पु¥याउनै गाह्रो भएकै हो । यो वर्ष पनि उही पुराना ग्राहकहरू आइरहनुभएको छ,” उनले भने, “यो वर्ष फूल पनि राम्रो भएको छ । यहाँको सबै सयपत्री फूल बिक्री हुनेमा म विश्वस्त छु ।”
रजिताले यो वर्ष सयपत्री फूल बिक्री गरेर १ लाख ५० हजार रुपैयाँ आम्दानी गर्ने आँकलन गरेको छ । “यो वर्ष फूल बिक्रीबाट डेढ लाख जती आम्दानी गरिन्छ की भन्ने आशा छ,” रजिताले भने, “त्यसमा पचास हजार रुपैयाँ जति खर्च भएको छ । आफ्नो मेहनत छुट्टै छ । सबै खर्च कटाउँदा ७०–८० हजार जति फाइदा होला ।”
रजिताको नर्सरीमा अन्य फूलका बिरुवाहरू पनि छन् । सयपत्री, मखमली, गोदावारी, जाडो मौषमका फूलमा फिटुनिया, प्यान्जी, भ्यागुते लगायत फूलको विरुवा छन् । जसले गर्दा रजिता अरु दिन पनि नर्सरीमा व्यस्त हुनछन् । नर्सरीमा उनको श्रीमान शङ्कर गुरुङले पनि राम्रै साथ दिइरहेको रजिताले बताए । साथै नर्सरीमा दैनिक ३ जना कर्मचारीले काम गरिरहेका छन् ।
फूलको बिरुवा बिक्री अनि सयपत्री फूल बेचेको पैसाले रजिताको परिवार पालिएको उनले बताए । “मेरो परिवारमा श्रीमान, म अनि एउटा बच्चा छ । एक जना बहिनी पनि मैसँग बस्छिन् । उनले पनि मलाई नर्सरीमा साथ दिन्छ,” रजिताले भने, “नर्सरीबाट वर्षमा यति नै कमाउँछु भन्ने यकिन त छैन् । तर, यहाँको कमाइले खान, लगाउन, अनि दुःख बिमार हुँदा उपचार गर्न पुगेको छ ।” नर्सरीमा काम गर्ने ३ जना कामदार पनि पारिश्रमिकबाट खुसी नै रहेको रजिताले सुनाइन ।
सानोदेखि नै फूलमा शौखिन भएकाले नर्सरी व्यावसायमा लागेको रजिताले बताए । अहिले फूलसँग रमाउने र कमाउने पेसाले आफू सन्तुष्ट रहेको उनको भनाइ थियो । “मन परेको काम गर्न पाएको छु, निकै खुसी छु,” रजिताले भने, “फूलबाट भएको आम्दानीले परिवार पाल्न पाउँदा झनै सन्तुष्ट छु ।”
यो व्यावसायमा झरी अनि असिना पानीको समस्या रहेको रजिता बताउछिन । सरकारी निकायमा दर्ता गरेर व्यावसाय गर्नेहरूलाई समस्या परेका बेला साथ दिनुपर्ने उनको तर्क छ । “पोहोर सालको दशैमा झरी पर्दा मैले लगाएको फूललाई धेरै असर ग¥यो । क्षति पनि भयो । कहाँ कसलाई भन्ने थाहै भएन्,” रजिताले भने, “सरकारी निकायमा दर्ता गरेपछि सरकार छ भन्ने पनि आभास दिलाउनुपर्छ । अरुले छुट अनुदान के के हो पाए भन्छन् मैले त अहिलेसम्म केही लिएको छैन् ।”