गोरखा । गोरखा एक ऐतिहासिक महत्व बोकेको जिल्ला भएकाले पनि यहाँको इतिहास बुझ्न र अध्ययन गर्न नचाहानेहरु प्राय कमै हुन्छन् । गोरखा घुम्न आउने विदेशी पर्यटक मात्र होइन आन्तरिक पर्यटकहरुका लागि पनि ऐतिहासिक गोरखा दरवार, धार्मिक आस्थाको धरोहरको रुपमा रहेको प्रसिद्ध धार्मिकस्थल कालिका मन्दिर, मनकामना मन्दिर र गोरखा दरवार सङ्ग्राहलय पर्यटकिय गन्तव्यको रुपमा रहँदै आएका छन् ।
गोरखा जिल्ला घुम्न आउनेहरु बिशेष गरेर गोरखाको विरताको नजिकबाट अध्ययन र अवलोकन गर्न रुचाउछन् । यिनै पर्यटकिय गन्तव्यहरुसंगै राष्ट्रिय विभूति भीमसेन थापाको जन्मथलोमा रहेको भीमसेन पार्क नयाँ पर्यटकको रुपमा विकास हुँदै गएको छ ।
गोरखा नगरपालिका–४, फिनाम स्थित भीमसेन थापाको जन्मथलो पिपलथोकमा रहेको भीमसेन पार्क पछिल्लो गोरखा आउने आन्तरिक पर्यटकहरुका लागि नयाँ गन्तव्यको रुपमा विकास भएको छ । विशेष गरेर शैक्षिक भ्रमणमा आउने अघिकांस पर्यटकहरु राष्ट्रिय विभूति थापाको स्मृतिमा निर्माण गरिएकोे भीमसेन पार्कको अध्ययन र अवलोकन गर्न पुग्ने गरेका छन् ।
‘‘जिल्ला भित्रका मात्र होइन बाहिरी जिल्लाबाट दैनिकजसो भ्रमणमा आउने गरेका विद्यार्थीहरु लगायतका अन्य आन्तरिक पर्यटकहरु भीमसेन पार्क हेर्न आउने गर्छन, पार्क रेखदेख गर्दै आउनुभएकी निर्मला शर्मा वाग्लेले भन्नुभयो, ‘‘यहाँ आएर सवै खुशी भएर फर्कने गरेका छन् ।’’
कात्तिक महिना यता मात्रै अहिलेसम्म करिब ५ सयजनाले भीमसेन पार्क आएर अवलोकन भ्रमण गरेको उहाँले बताउनुभयो । पाल्पा, पर्वत, बाग्लुङ, संखुवासभा, झापा, तनँहु लगायत गोरखा घुम्न आएका अघिकासं आन्तरिक पर्यटकहरु एक पटक भीमसेन पार्क आउन थालेको वाग्लेको भनाई छ । पार्क हेर्न र घुम्न आउने आन्तरिक तथा वाह्य पर्यटकहरुका लागि प्रवेश शुल्क वापत १० रुपैया र विद्यार्थीहरुका लागि ५ रुपैया टिकट काट्नु पर्ने व्यवस्था रहेको उहाँले जानकारी दिनुभयो ।
पार्कमा आएर भीमसेन थापाको पूर्णकदको शालिकमा तस्विर खिचाउन पाउदा विद्याथीहरु खुशी हुने गरेको वाग्लेको भनाई छ । भीमसेन पार्कबाट मनास्लु, हिमालचुली, गणेश हिमाल, लमजुङ हिमाल, माछापुच्छ्रे लगायत हिमशृंखला अवलोकन गर्न सकिन्छ । साथै, गोरखाको ऐतिहासिक र पर्यटकीय केन्द्र अजिरकोट, सिरानचोक गढी, लिगलिगकोट दृश्यावलोकन गर्न सकिन्छ ।
पार्कबाट देखिने सुन्दर हिमश्रृखला र मनोरम दृष्य यहाँ घुम्न आउने पर्यटकहरुका लागि अर्को आर्कषण केन्द्र बनेको हो । माथिल्लो गोरखा दरवारसंगै रहेको प्रसिद्ध कालिका मन्दिर पुगेपछि करिब दश मिनेटमा पुग्न सकिने भएकाले भीमसेन पार्क आन्तरिक तथा बाह्य पर्यटकको रोजाईमा पर्न थालेको हो ।
पार्क हेर्न र घुम्नका लागि दैनिकजसो फरक फरक जिल्लाहरुबाट पर्यटकहरु आउने गरेकोे उहाँको भनाई छ । ‘‘कुहिरो र तुवालो नलागेको दिन हुनुपर्छ यहाँ आएर दृष्यावलोकन गर्न पाएपछि फर्किएर जानै मन नलाग्ने हुँदो रहेछ, पार्कमा भेटिनु भएका तनहुँका रोसन पाण्डेले भन्नुभयो, ‘‘भीमसेन पार्क ऐतिहासिक दृष्टिकोणले मात्र होइन मनोरम दृष्यले पनि साच्चै मनमोहक रहेछ ।’’
बिसं १८३२ मा पीपलथोकमा जन्मनु भएका थापा विसं १८६३ देखि १८९२ सम्म नेपालको मुख्तियार (प्रधानमन्त्री सरह) का रुपमा जिम्मेवारी सम्हाल्नु भएकाे थियो । थापाको विसं १८९६ मा मृत्यु भएको थियो ।
रासस