गोरखा । सदरमुकाममा रक्सी सेवन गरेर एम्बुलेन्स चलाएको आरोपमा १ जना चालकलाई प्रहरीले नियन्त्रणमा लिएको छ । प्रहरीले नियन्त्रणमा लिएका ब्यत्ती गोरखा नगरपालिका–८ आहाले निवासी हरीशरण गोदार भएको प्रहरीले पुष्टी गरेको छ ।
ग. २ च ७४९४ नम्बरको एम्बुलेन्स चालक रहेका गोदारले अत्याधिक रक्सी सेवन गरेर विपरीत दिशाबाट आएको बोलेरो जिपलाई ठक्कर दिनुका साथै एम्बुलेन्स समेत दुर्घटना गराएका थिए । गएको सोमबार उक्त घटना पछी प्रहरीले गोदारलाई गोरखा नगरपालिका–८ को बराह क्षेत्रबाट नियन्त्रणमा लिएको जिल्ला प्रहरी कार्यालय गोरखाका प्रहरी नायब उपरिक्षक तथा सूचना अधिकारी रमेशकुमार श्रेष्ठले जानकारी दिए ।
सूचना अधिकारी श्रेष्ठका अनुसार चालक गोदारले सोमबार नै ना. ५ च २४५४ नम्बरको बोलेरोलाई ठक्कर दिएर भाग्ने क्रममा सदरमुकामको प्रतिक्षालय चोकमा एम्बुलेन्स नालामा खसालेका थिए ।
पक्राउ परेका चालक बिरुद्व मंगलबार नै जिल्ला प्रशासन कार्यालयमा सार्वजनिक हित बिरुद्वको कसूर शिर्षक अन्तरर्गत मुद्वा दर्ता गराएको छ । उनलाई प्रहरीको हिरासतमा राखेर थप अनुसन्धान सुरु गरीएको पनि प्रहरीले जानकारी दिएको छ ।