साँकेतिक तस्बिर
गोरखा । भिजिट भिसामा विदेश पठाई दिने भनी नक्कली कागजातहरू बनाएको आरोपमा गोरखाका १ जना युवक सहित प्रहरीले ४ जनालाई राजधानीको विभिन्न स्थानबाट पक्राउ गरेको छ ।
पक्राउ पर्नेहरूमा गोरखाको सिरानचोक गाउँपालिका–८ जौबारी घर भई काठमाडौं बसुन्धारा बस्ने ३४ वर्षीय भक्तबहादुर थापा, नवलपरासी पूर्व मध्यबिन्दु नगरपालिका–५ घर भई काठमाडौं बालाजु बस्ने ४५ वर्षीय जयराम श्रेष्ठ, काठमाडौं महानगरपालिका–१ नक्साल बस्ने ३८ वर्षीय दिपक केसी र सल्यान कालीमाटी रामपुर गाउँपालिका–३ घर भई काठमाडौं नागार्जुन बस्ने ४२ वर्षीय बलबहादुर रावत भएको काठमाडौं उपत्यका अपराध अनुसन्धान कार्यालय मिनभवन जनाएको छ ।
भिजिट भिषामा विदेश जाने व्यक्तिहरूको कागजात जाँच गर्ने क्रममा फेला परेका राहदानीसहितका कागजातहरू १ हजार ३२ थान तथा विभिन्न नक्कली कागजात २९६ थान त्रिभुवन अन्तर्राष्ट्रिय बिमानस्थलमा फेला परेपछि थप अनुसन्धानको लागि काठमाडौं उपत्यका अपराध अनुसन्धान कार्यालय मिनभवन पठाएको थियो ।
अनुसन्धानको क्रममा उक्त कागजातहरू नक्कली भएको पुष्टी हुन आएको काठमाडौं उपत्यका अपराध अनुसन्धान कार्यालय जानकारी दिएको छ । नक्कली कागजातहरू बनाउने ब्यत्तीहरु विभिन्न भूमिकामा रहेको पनि खुल्न आएपछि उनीहरूलाई प्रहरीले पक्राउ गरेको हो ।
पक्राउपरेकाहरूबाट काठमाडौं उपत्यका अपराध अनुसन्धान कार्यालयले विभिन्न कलेज तथा विद्यालयका शैक्षिक प्रमाण र लेटरप्याड, जन्मदर्ताका कागजातहरु, विभिन्न बैंकहरूको स्टेटमेण्ट तथा चेक, HSEB लेखिएको होलो ग्राम, CTEVT को स्टिकर, सवारी चालक अनुमतिपत्र, राहदानी, निर्वाचन परिचयपत्र, भारत सरकारको आधार कार्ड, नागरिकताका कागजातहरू, विभिन्न सरकारी तथा निजि कार्यायहरूको छापहरु, लेमिनेसन मेसिन १ थान, ल्यापटप १ थान, प्रिन्टर २ थान र पेन्ड्राईभ २ थान बरामद भएको छ ।
उनीहरूलाई लिखत सम्बन्धी कसूरमा आवश्यक अनुसन्धान एवं कारवाहीको लागि प्रहरी वृत्त महाराजगंज काठमाडौं पठाइएको पनि काठमाडौं उपत्यका अपराध अनुसन्धान कार्यालय मिनभवनले जनाएको छ ।