गोरखा । उत्तरी गोरखाको आरुघाट गाउँपालिकामा पर्ने स्तुल खोलामाथी बेलीब्रिज निर्माण सम्पन्न भएको छ । आरुघाट–आरुपोखरी–ताकुकोट सडकखण्डमा पर्ने स्तुल खोलामाथी सम्झौता अवधी भित्रै पुल निर्माण भएको एघारकिलो–छेवेटार–भालुस्वाँरा–बारपाक सडक आयोजना कार्यालय गोरखाले जनाएको छ ।
आरुघाट गाउँपालिकाको वडा नम्बर ८ र ९ जोड्ने स्तुल खोलामाथी बनेको उक्त पुल आयोजनाले ३ करोड ८० लाख रुपैयाँ निर्माण गरेको आयोजना प्रमुख अमिन्द्र खड्काले जानकारी दिए । पुल नहुदा बर्खाका बेला सवारी साधान आवातजावतमा कठिनाई हुने गरेको थियो ।
जलप होम जेवीले निर्माण गरेको उक्त पुल निर्माण १ बर्ष भित्र निर्माण सम्पन्न गर्ने गरी आयोजनाको सम्झौता भएको थियो । तर ठेकेदार कम्पनीले ४ महिनामा नै काम सम्पन्न गरेको कार्यालय प्रमुख खड्काले जानकारी दिए ।
बेलीब्रिज निर्माण सम्पन्न भएसंगै आरुघाट बजारहुँदै सवारी साधान मार्फत ओहोरदोहोरका लागि आरुपोखरीका बासिन्दाहरुलाई अहिले सजिलो भएको छ ।
पुल नबन्दा हिउँदका बेला जसोतसो सवारी साधन वारपार गराएपनि बर्खामा भने सवारी सञ्चालन हुन सकेको थिएन । पुल निर्माण सम्पन्न पछी आरुघाट गाउँपालिका–७, ८ र ९ तथा आरुपोखरी, बारपाक सुलिकोट गाउँपालिकाको तीनखण्डे, बालुवा गैरीछाप लगायतका क्षेत्रका स्थानीय बासिन्दाहरु लाभान्विदत भएको आयोजनाले जनाएको छ ।
पुलकाे भारवहन क्षमता २० टन रहेकाे छ । उक्त पुलमा एक पटकमा १ वटा मात्र सवारी चल्ने मिल्ने गरी निर्माण भएकाे हाे । पुलकाे कुल लम्बाई भने ३६.५७६ मिटर रहेकाे आयाेजनाकाे कार्यालयले जानकारी दिएकाे छ ।
