गोरखा । उत्तरी गोरखाको मनास्लु क्षेत्र घुम्न पुग्ने आउने विदेशी पर्यटकको संख्या ह्वात्तै बृद्धि भएको छ । चुमनुब्री गाउँपालिकामा पर्ने मनास्लु संरक्षण क्षेत्रमा यसबर्षको अक्टोवरसम्ममा ७ हजार ८६२ जना बिदेशी पर्यटकहरुले मनास्लु संरक्षण क्षेत्रको भ्रमण गरिसकेको एक तथ्यांकले पुष्टी गरेको हो ।
मनास्लु संरक्षण क्षेत्र आयोजना कार्यालय (एमक्याप) गोरखाका प्रमुख सन्तोष शेरचनले यो बर्ष सोचेभन्दा धेरै विदेशी पर्यटकले मनास्लु संरक्षण क्षेत्रका भ्रमण गरेको बताए । उनका अनुसार अक्टोवर महिनासम्ममा उक्त क्षेत्रमा अघिल्लो बर्षभन्दा बढी पर्यटक भ्रमणका लागि पुगिसकेको बताए । ‘‘सन २०२२ मा एक बर्षमा ६ हजार १०२ जना पर्यटक मनास्लु क्षेत्रमा पुगेका थिए, उनले भने, ‘‘यो बर्ष सकिन अझै दुई महिना बाँकी छदैँमा मनास्लु घुम्न ७ हजार ८०० भन्दा बढी पर्यटक पुगीसकेका छन् ।’
मनास्लु क्षेत्र घुम्न जानेहरुमा यसबर्ष सार्क राष्ट्रका १७८ जना, रहेका छन् भने त्यस वाहेकका अन्य देशका ७ हजार ६८४ जनाले उक्त क्षेत्रको भ्रमण गरीसकेका छन् । मनास्लु क्षेत्र पुग्ने पर्यटकहरुमा ४ हजार ५१९ जना पुरुष र ३ हजार ३३८ जना महिला पर्यटक रहेको एमक्याप गोरखाले जनाएको छ ।
कोराना संक्रमणका कारण सुस्ताउदै गएको मनास्लु संरक्षण क्षेत्रमा पर्यटक बृद्वि भए लगत्तै उक्त क्षेत्र बिस्तारै लयमा फर्कन थालेको अनुमान लगाउन सकिन्छ ।
कार्यालयले उपलब्ध गराएको तथ्याङक अनुसार मनास्लु क्षेत्रमा सन् २०२१ मा ९२५ जना बिदेशी पर्यटक मात्र मनास्लु क्षेत्रको भ्रमण गर्न पुगेका थिए । अघिल्ला बर्षको तुलनामा यसबर्ष अत्याधिक पर्यटक मनास्लु घुम्न पुगेको देखिन्छ ।
‘यसबर्ष करिब १२ हजारभन्दा बढी पर्यटक मनास्लु पुग्ने अपेक्षा गरिएको छ’, प्रमुख शेरचनले भने, ‘साउन महिना यतादेखि असोज अन्तिमसम्म मात्र २ हजार ९०३ जना बिदेशी पर्यटक मनास्लु पुगेका छन् ।’
साउन महिना ८० जना, भदौमा ३२ जना सार्क राष्ट्रका सहित ५४७ जना र असोजमा ६५ जना सार्क राष्ट्रका सहित २ हजार २७६ जना विदेशी पर्यटकहरुले मनास्लु क्षेत्रको भ्रमण गरेको उनले बताए । निषेधित क्षेत्रको रुपमा रहेको मनास्लु क्षेत्रलाई सरकारले सन् १९९५ देखि पर्यटकहरुका लागि खुल्ला गरेको थियो ।
तस्बिर भुवन ओझा :एमक्याप/फिलिम, गोरखा