साँकेतिक तस्बिर
गोरखा । श्रम स्वीकृति लगायतका नक्कली कागजातहरु बनाएको आरोपमा गोरखाका २ जना युवाहरुलाई प्रहरीले राजधानीबाट पक्राउ गरेको छ ।
पक्राउ पर्नेहरूमा बारपाक सुलिकोट गाउँपालिका–४ घर भई हाल काठमाडौं बनस्थली बस्ने २३ वर्षीय अजित फेवाली र गोरखा बारपाक सुलिकोट गाउँपालिका–४ घर भई हाल काठमाडौं नागार्जुन नगरपालिका–१ रानीवन बस्ने २१ वर्षीय विपिन ढकाल रहेका छन् ।
भिजिट भिषामा विदेश जान लागेका व्यक्तिहरूको कागजात शंकास्पद रहेको भनि त्रिभुवन अन्तर्राष्ट्रिय विमानस्थलबाट कात्तिक १२ गते पठाइएका कागजातहरूमध्ये सुजल हेङगजुको नामको श्रम स्वीकृति नक्कली देखिएको थियो ।
दुवै जनालाई काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीको टोलीले काठमाडौं महानगरपालिका–१३ सोल्टीमोडस्थित वैदेशक रोजगार सम्बन्धि काम गर्ने ट्राभल्सबाट पक्राउ गरेको हो ।
साथै उक्त ट्राभल्सको कोठाबाट मोबाइल २ थान र सिपियु १ थान समेत प्रहरीले नियन्त्रणमा लिएको छ । पक्राउ परेका दुवैलाई थप अनुसन्धान तथा कारवाहीको लागि प्रहरी वृत्त कालिमाटी बुझाएको पनि काठमाडौं उपत्यका अपराध अनुसन्धान कार्यालय जानकारी दिएको छ ।