गोरखा । ठेकेदार कम्पनीकाे लापर्वाही र सडक कार्यालयकाे वेवास्ताका कारण उत्तरी गाेरखाकाे अझुवामा ७ बर्षमा पनि पुल सम्पन्न हुन सकेकाे छैन । बेनिघाट-आरुघाट-आर्खेत-लार्के सडकखण्ड अन्तर्गत पर्ने अजुवा खोला मोटरेवल पुल निर्माण सुरु भएको ७ बर्ष बितिसक्दा पनि निर्माण सम्पन्न हुन जसकेको हाे ।
आरुघाट गाउँपालिकाको ३ र ४ उक्त पुल ठेकेदार कम्पनीले लामो समयदेखि अलपत्र अवस्थामा छाडेकाे हो । एघारकिलो-छेपेटार-भालुस्वाँर- बारपाक सडक आयोजनाको कार्यालयले ठेक्का लगाएको उक्त पुल ठेकेदार कम्पनीको चरम लापरवाहीका कारण ढिलासुस्ती भएको हो ।
बिस २०७४ साउनमा कार्यालयले कन्काई गोरखा एप्रोपेट जेभीसंग मोटरेवल पुल निर्माणका लागि ठेक्का सम्झौता गरेको थियो । सम्झौता अनुसार १८ महिना भित्र अर्थात २०७५ माघमा निर्माण सम्पन्न गर्नुपर्ने पुल सम्झौता भएको ७ बर्ष बितिसक्दा पनि अलपत्र अबस्थामा रहेको छ ।
पुल निर्माणका लागि ठेकेदार कम्पनीले हेलचक्राइ गर्दा समेत कार्यालयले आवश्यक पहल नगरेको स्थानीयबासीहरुको गुनासो रहेकाे छ ।
निर्धारित समयमा काम सम्पन्न नगरेको कम्पन्नीलाई पटक पटक गरेर ४ पटक म्याद थप गरिसकेको घारकिलो-छेपेटार-भालुस्वाँर- बारपाक सडक आयोजनाको कार्यालयका प्रमुख अमिन्द्र खड्काले जानकारी दिए । पछिल्लो पटक गरिएको म्याद थप अनुसार गएको असारसम्म काम सम्पन्न गर्नुपर्ने थियो ।
असारमा पनि काम सम्पन्न नगरे पछी पुन: (पाँचाै पटक) म्याद थपका लागी पहल भइरहेकाे कार्यालयले जनाएकाे छ ।
४ करोड रुपैयाँमा पुल निर्माणका लागि ठेक्का सम्झौता गरेको कार्यालयले ठेकेदार कम्पनीलाई ३ करोड २० लाख रुपैयाँ भुक्तानी दिइसकेकाे छ । कार्यालयले दिएकाे जानकारी अनुसार पुलको भौतिक प्रगती भने ८३ प्रतिसत रहेको छ ।
ठेक्का सम्झौता अनुसार पुलसंगको पहुँच मार्ग निर्माण, पुलको दाँयाबाँया रेलिङ निर्माण लगायतको काम बाँकी नै रहेको छ । ठेकेदार कम्पनीले नियमित रुपमा काम गरेकाे खण्डमा बाँकी काम सम्पन्न गर्न १ महिना पनि नलाग्ने कार्यालयले जनाएकाे छ ।
३० मिटर लम्बाई र ११ मिटर चौडाईको पुलमा फुटपाथ सहित निर्माण गर्ने गरी कार्यालयले ठेक्का सम्झौता गरेको थियो ।