काठमाडौं । त्रिकोणात्मक टी-२० आई सिरिजको उपाधि भिडन्तमा नेपालले युएईलाई १६३ रनको मध्यम लक्ष्य दिएको छ । टियु क्रिकेट मौदानमा जारी खेलमा टस जितेर बलिङ रोजेको युएईसामु नेपालले १६२ रनको योगफल प्रस्तुत गरेको हो ।
जारी खेलमा नेपालका लागि ओपनर व्याट्सम्यानद्वय कुशल भुर्तेलले २९ बलको सामना गर्दै ५० रनको योगदान गर्दा आसिफ शेखले १२ बलमा ७ रन जोडे ।
यस्तै १८ बलको सामना गरेका क्याप्टेन रोहित पौडेलले १७ रन, दिपेन्द्र सिंह ऐरिले १५ बल खेल्दा २० रन, सन्दीप जोराले १० बलमा १० रन, गुल्छन झाले ८ बलमा ५ रन बनाउँदा क्याच आउट भए ।
सोमपाल कामीले ८ बलमा १३ रन बनाउँदा करण केसीले अभिजित २३ रनको योगदान गरे । सुरु देखि नै कडा फिल्डिङ गरेको युएईका बलर आयान अफ्जल खानले सर्वाधिक ३ विकेट लिए ।
त्यस्तै, अलि नासिर र जाहोस खानले समान २ र जुनैद सिद्दकी ले १ विकेट लिए । हङकङसमेत सहभागी सिरिजमा नेपाल र युएई शीर्ष दुईमा परेसँगै फाइनलमा उपाधिका लागि प्रतिस्पर्धा गरिरहेका छन् ।