काठमाडौ । यूएईलाई हराउँदै नेपालले एसीसी यू-१९ प्रिमियर कपको उपाधि जितेको छ । मंगलबार मलेसियामा भएको फाइनल खेलमा यूएईलाई डीएल मेथडमा १९ रनले हराउँदै नेपालले उपाधि हात पारेको हो ।
देव खनालको कीर्तिमानी ब्याटिङ र आकाश त्रिपाठीको घातक बलिङमा नेपालले उपाधी जितेको हो । नेपालले दिएको २८१ रनको लक्ष्य दिए पनि वर्षाले खेल प्रभावित भएपछि यूएईले २७ ओभरमा १९८ रनको नयाँ लक्ष्य पाएको थियो । यूएई १ बलअगावै १७८ रनमा समेटियो ।
११औं ओभरको खेल जारी रहँदा वर्षाले खेल प्रभावित भएपछि खेल २७ ओभरमा घटाइएको थियो । ११औं ओभरमा यूएई ५०–२ को अवस्थामा थियो । यूएईलाई रोक्न नेपालका आकाश त्रिपाठी एक्लैले ४ विकेट लिए ।
सुवास भण्डारीले ३ विकेट लिए । आकाश चन्दले २ तथा हेमन्त धामीले १ विकेट आफ्नो नाममा गरे । यूएईका ध्रुव परासरले सर्वाधिक ५९ रनको योगदान दिए ।
त्यसअघि मलेसियाको बायोमास ओभलमा टस जितेर ब्याटिङ गरेको नेपालले निर्धारित ५० ओभरमा ८ विकेटको क्षतिमा २८० रनको योगफल तयार पारेको थियो ।
नेपालका लागि कप्तान देव खनालले ऐतिहासिक शतक प्रहार गरे । कप्तान देवले ९२ बलमा ९ चौका र ३ छक्का प्रहार गरे ।