गोरखा । गोरखा दरर्बारबाट आज हनुमान ढोकाकोलागी फुलपाती पठाइएको छ । फुलपाती बिहानको शुभ साइत अनुसार ८ बजेर १९ मिनेटमा हनुमान ढोका पठाइएको गोरखा दरर्बारमा मुल पुजारी सारदाप्रसाद भट्टराईले बताए ।
गोरखा दरर्बारका कर्मचारीहरुले आजै बिहान दरर्वार वरपर रहेको जंगलबाट उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र अन्य नयाँ पालुवा खोजेर ल्याई हनुमान ढोका पठाइएको हो ।
फुलपाती बा. २ झ २१२८ नम्बरको सरकारी स्कारपियोमा हनुमान ढोका पठाएको हो । तत्कालीन गोरखाका राजा पृथ्वीनारायण शाहले काठमाडौँको हनुमानढोका दरबारबाट राजकाज सुरु गरेदेखि बर्सेनि बडादशैंको सातौँ दिन गोरखा दरबारको दशैं घरबाट फूलपातीसहितको डोली काठमाडौँको हनुमानढोका दरबार पुर्याएर भित्र्याउने प्रचलन रहँदै आएको छ ।
गोरखा दरबारको दशैंघरबाट सतिपिपलस्थित फूलपाती चौतारासम्म फूलपातीको डोली दरबारका सुसारेहरूले बोकेर ल्याई त्यहाँबाट हनुमानढोका दरबार पठाउने प्रचलन रहँदै आएको छ ।
गोरखा दरर्बारमा फुलपाती भित्राए संगै देशैभरका सर्व साधारणहरुको घरमा फुलपाती भित्राउने प्रचलन रहदै आएको छ ।
फुलपाती राजधानी पठाउनु अगाडी प्रमुख जिल्ला अधिकारी दिनेससागर भुषाल, गोरखा नगरपालिकाका उपप्रमुख मसलीमायाँ थोकर पुनःका साथै जिल्ला भित्र रहेका सुरक्षा प्रमुख तथा विभिन्न सरकारी तथा संघ संस्थाका प्रतिनिधीहरुको समेत उपस्थिती रहेको थियो ।
