काठमाडौं । त्रिकोणात्मक टी-२० क्रिकेट शृंखलामा नेपालले लगातार दोस्रो जित निकालेको छ । बिहीबार भएको दोस्रो खेलमा नेपालले, हङ्कङलाई ६ विकेटले पराजित गरेको हो ।
जारी शृंखलामा नेपालको यो दोस्रो जित हो । यसअघि बुधबार खेलिएको पहिलो खेलमा नेपालले संयुक्त अरब इमिरेट्स (यूएई) लाई ७ विकेटले हराएको थियो ।
काठमाडौँको मुलपानी क्रिकेट मैदानमा बिहीबार टर हारी पहिले ब्याटिङको निम्तो पाएको हङ्कङले १९.३ ओभरमा अलआउट हुनुअघि ९४ रन बनाएको थियो ।
जवाफी ब्याटिङमा ओर्लिएको नेपालले भने १३.५ ओभरमा ४ विकेट गुमाएर ९९ रन बनाउँदै विजयलक्ष्य पार गरेको थियो । नेपालका लागि आसिफ शेखले सर्वाधिक ४२ रनको योगदान गरे । कप्तान रोहित पौडेलले अविजित २५ रन बनाए ।
त्यसअघि नेपालले जितका लागि हङ्कङबाट ९५ रनको लक्ष्य पाएको थियो । हङ्कङलाई ठूलो योगफल बनाउन नदिन नेपाली टोलीका बलर करण केसीले ४ विकेट लिएका थिए ।
सोमपाल कामी र अविनोष बोहराले पनि २-२ विकेट हात पारेका थिए भने कुशल मल्ल र मौसम ढकालले १-१ विकेट लिए ।
