गोरखा । बर्खा संगै अबरुद्ध बारपाक–लाप्राक सडकखण्ड ३ महिना पछी सञ्चालनमा आएको छ । बर्खा लागे लगत्तै उक्त सडक खण्डको ठाउँठाउँमा खसेको पहिरोका कारण असार पहिलो सातादेखि अबरुद्ध भएको थियो ।
अबरुद्ध सडकखण्ड असोज ३० गते मंगलबारदेखि सञ्चालनमा आएको सडक पूर्वाधार बिकास कार्यालय गोरखाका प्रमुख गणेश सुवेदीले जानकारी दिए । पर्यटकिय गन्तव्य समेत रहेको उक्त सडकखण्ड लामो समयसम्म अबरुद्ध भएपछि चौतर्फी आलोचना हुँदै आएको थियो ।
नेपालीहरुको चाढपर्व पनि आएका कारण साता दिनभन्दा लामो समयलगाएर ठूला मेशिनले पहिरो पन्छाए पछी अबरुद्ध सडक सञ्चालनमा ल्याउन सकिएको प्रमुख सुवेदीले जानकारी दिए ।
कार्यालयले सडक निर्माणको ठेक्का पाएको शर्मा÷विक्वी जेभीलाई सडक सफा गर्न भने पछी पहिरो हटाएर अबरुद्ध सडक सञ्चालनमा आएको हो । सडक अबरुद्ध हुँदा लाप्राक तथा त्यस वरपर रहेको दर्जनौ गाउँमा दैनिक उपभोग्य सामग्री पुरर्याउन समस्या हुँदै आएको थियो ।
सडक अबरुद्ध खाद्यसामग्री खच्चड मार्फत ढुवानी हुदै आएको थियो । हरेक बर्ष बर्खा लागेसंगै उक्त सडकखण्ड अबरुद्ध हुने गर्दछ ।
बारपाक–लाप्राक सडकखण्ड २०७७ जेठ ९ गते ठेक्का सम्झौता गरी स्तरोन्नतीको काम सुरु गरिरहेको हो । ठेकेदार कम्पनीले समयमा काम नगर्दा त्यसक्षेत्रका बासिन्दाहरुले हैरानी खेप्दै आउनु परेको छ ।
ठेक्का सम्झौता भएको झण्डै ४१ महिना भइसक्दा समेत स्तरोन्नतीको काम सम्पन्न हुन सकेको छैन । पूर्वाधार बिकास कार्यालय गोरखाले २०७९ जेठसम्ममा सडक स्तरोन्नतीको काम सम्पन्न गर्ने गरी शर्मा÷विक्वी जेभीसंग ठेक्का सम्झौता गरेको थियो । सडकको भौतिक प्रगती अहिलेसम्म ५२ प्रतिसत मात्र रहेको कार्यालय प्रमुख सुवेदीले जानकारी दिए ।
तोकिएको समयमा काम सम्पन्न गर्न नसक्ने देखिएपछि कार्यालयले गएको जेठ २२ गते भित्रका काम सम्पन्न गर्नेगरी म्याद थप गरेको थियो । थपिएको म्याद सकिएको ४ महिना भइसक्दा पनि सडक स्तरोन्नतीको काम भने अझै अलपत्र अवस्थामा रहेको छ ।
कार्यालयले ३४ करोड १५ लाख ७१ हजार १९८ रुपैयामा ठेक्का सम्झौता गरेको उक्त बाटोको लम्बाई १३.१४ किलोमिटर छ ।
