गोरखा । सार्वजनिक स्थानमा हो–हल्ला गरी अशान्ति मच्चाउको आरोपमा गोरखा प्रहरीले २ जना युवकलाई नियन्त्रणमा लिएको छ । प्रहरीले नियन्त्रणमा लिएकाहरुमा गण्डकी गाउँपालिका–१ मकैसिङका २२ बर्षिय बिशाल परियार र १८ बर्षका मनोज परियार भएको जिल्ला प्रहरी कार्यालय गोरखाका प्रहरी नायब उपरिक्षक तथा सूचना अधिकारी रमेशकुमार श्रेष्ठले जानकारी दिए ।
उनका अनुसार पक्राउ परेका दुवै जनाले असोज २८ गते आइतबार राती २ बजेको समयमा मादक पदार्थ सेवन गरी स्थानियको घरको ढोका तथा सवारी साधनहरुमा ढुङ्गा हाने पछि गस्तीमा रहेको प्रहरीले सम्झाउदा उल्टै प्रहरी माथी नै हातपात गर्न खोजेको र अपशब्द प्रयोग गर्दै गाली गलौच गरे पछि नियन्त्रणमा लिएको हो ।
पक्राउ परेका दुवै जनालाई सार्वजनिक शान्ति बिरुद्वको कसूर शिर्षकमा मुद्वा दर्ता गरी जिल्ला प्रशासन कार्यालय गोरखाबाट सोमबार म्याद थप गरीएको प्रहरीले जानकारी दिएको छ ।
दुवै जनालाई प्रहरीको हिरासतमा राखेर अनुसन्धान सुरु गरिएको पनि गोरखा प्रहरीले जनाएको छ ।