गोरखा । गोरखा बजार र आसपासका क्षेत्रमा दसैंको मुखमा तरकारीको मूल्य आकासिएको छ । सामान्यतया यो मौषममा केही तरकारीको मुल्य मात्र बृद्वि हुने गरेको भएता पनि यो बर्ष सबै तरकारीमो मुल्य उच्च भएको हो ।
विशेष गरेर हरियो तरकारीको भाउ हप्ता दिन यतादेखी ह्वात्तै बढेको छ । हप्ता दिन अगाडीसम्म पनि १०० रुपैयाँ किलोको तनेबोडी अहिले प्रतिकिलो १५० रुपैयाँमा बिक्री गर्दै आएको प्रेमिता तरकारी तथा फलफुल पसलका सञ्चालक निरबहादुर योगीले बताए । ‘हामीले तरकारी बाहिरी जिल्लाबाट ल्याउनु पर्छ’ योगीले भने ‘सस्तो आएको बेला सस्तोमा नै बेच्छौ, महंगो भएर आएको बेला त्यही अनुसार बेच्छौ ।’
गोरखाको दक्षिणी भेगमा प्रसस्त तरकारी खेती हुने भएता पनि त्यहाँको तरकारी चितवनका ब्यापारीको हातमा पहिला पर्ने र पुनः उनीहरु संग खरिद गर्दा केही महंगो पर्न गएको पनि योगीले जानकारी दिए । गोरखा बजारमा तनहुँको याम्पाफाँट, चितवनको फिस्लीङ र धादिङको केही क्षेत्रका तरकारी आउने गर्दछ ।
गोरखा सदरमुकामदेखी दक्षिण तथा चितवन र धादिङ संग जोडिएका साविककका घ्याल्चोक, भूम्लिचोक, दरर्बुङ, ताङलीचोक र ताक्लुङ गाविसको अधिकाशं भागमा उत्पादित तरकारी खेती चितवन, पोखरा र राजधानीको कालीमाटी तरकारी बजारमा बिक्रीकालागि जाने गर्दछ ।
हप्ता दिन अगाडी १०० देखी १२० रुपैयाँ किलो बिक्री भएको काउली अहिले १५० मा बिक्री भएको छ । त्यस्तै गरी ७० देखी ८० रुपैयाँ किलोमा बिक्री भई रहेको करेला, भिण्डी, मुला र हाइब्रिड काँक्रो अहिले १०० देखी १२० रुपैयाँ किलोमा बिक्री हुदै आएको छ ।
गोरखा बजारमा तनहुको याम्पाफाँटबाट आउने तरकारी भने अन्यको तुलनामा सस्तोमा बिक्री भएको छ । बिन्दाबासीनी तरकारी सप्लायर्सका सञ्चालक बावुराम श्रेष्ठका अनुसार तनेबोडी–१३०, काउली–१४०, करेला–८०, भिण्डी–१००, काक्रो–८०, मुला–७०, सिमी–१०० र बन्दा–७० रुपैयाँमा बिक्री गरीएको बताए ।
सञ्चालक श्रेष्ठले तरकारी पनि गुणस्तर अनुसारको फरक मुल्य हुने पनि बताए । राम्रो गुणस्तरको तरकारी केही महंगो भएको र कम गुणस्तरका तरकारी बजारमा सस्तोमा बिक्री भएको पनि उनले जानकारी दिए ।
गोरखा बजारमा अहिले पाकेको फर्सी ५० देखी ८० रुपैयाँ किलोमा बिक्री भएको छ भने कन्य च्याउ २००–३००, अदुवा १५०–२००, लसुन ३००, प्याज ९० देखी १०० र आलु प्रतिकेजी ५० रुपैयाँमा बिक्री भईरहेको ।
गोरखा बजारमा १ महिना अगाडी मात्र प्याजको मुल्य प्रतिकेजी ५० रुपैयाँ किलो बिक्री हुदै आएको थियो ।
यता बजार अनुगमनको जिम्मेवारी पाएको जिल्ला प्रशासनले प्रभावकारी अनुगमन नगरिदिदा बजारमा अस्वस्थ्य प्रतिप्रर्धा भएको र उपभोत्ता मारमा परेका हुन् ।