साँकेतिक तस्बिर
गोरखा । उत्तरी गोरखाको मान्बुको श्यामचेतमा भएको बृद्व महिला हत्या घटनामा आरोपितहरु ३ जनालाई पुर्पक्षकालागि गोरखा कारागार चलन गरिएको छ ।
गएको भाद्र २८ गते आरुघाट गाउँपालिका–१ मान्बु श्यामचेतकी ७० बर्षिया सनमायाँ लामाको हत्या आरोपमा प्रहरीले पक्राउ गरेका स्थानिय २९ बर्षका कर्मा छिरिङ लामा, १९ बर्षका साने भन्ने सुपराज लामा र १९ बर्षका अन्जय लामा गुरुङलाई गोरखा जिल्ला अदालतले पुर्पक्षकालागि कारागार चलान गरेको हो ।
सनमायाँ गएको भाद्र ३० गते बिहान १० बजेको समयमा आफ्नै घर भित्र बलोमा नाम्लोको डोरीले पासो लगाई झुण्डीएको अवस्थामा फेला परे पछि प्रहरी घटना शंकास्पददेखी अनुसन्धान अगाडी बढाएको थियो । अनुसन्धानका क्रममा उक्त महिलालाई पहिला कर्तब्य गरी हत्या गरेर झुण्डाएको देखिन आएपछि घटनामा संलग्न भएको आरोपमा कर्मा छिरिङ लामा र साने भन्ने सुपराज लामालाई प्रहरीले पक्राउ गरेको थियो ।
पक्राउ परेका दुवैले भाद्र २८ गते बेलुकीको ६ बजेको समयमा घरमा कोही पनि नभएको मौका छोपी सनमायाँलाई घाँटीमा डोरीले २ तर्फबाट कसी कर्तव्य गरी मारी घटनालाई ढाकछोप गर्नको लागि मृतकलाई घरको कोठामा रहेको बलोमा लाश झुण्ड्याई मृतकको कानमा रहेको सुनको रिङहरु लुटि भागेको खुल्न आएको जिल्ला प्रहरी कार्यालय गोरखाका प्रहरी नायब उपरिक्षक तथा सूचना अधिकारी रमेशकुमार श्रेष्ठले जानकारी दिए ।
घटना पश्चात दुवैजनालाई भाग्न सहयोग गरेको खुल्न आए पछि अन्जय लामा गुरुङलाई समेत प्रहरीले पक्राउ गरेको थियो । पक्राउ परेका ३ जना उपर नै प्रहरीले जिल्ला सरकारी वकील कार्यालय मार्फत जिल्ला अदालत गोरखामा मुद्वा पेश भएकोमा असोज २५ गते बिहीबार उनीहरुलाई पुर्पक्षकालागि कारागार चलान गरेको गोरखा प्रहरीले जानकारी दिएको छ ।
