गोरखा । सहिद लखन गाउँपालिकाले अपाङ्गता भएका व्यक्तिहरुलाई घर–घरमा पुगेर अपाङ्गता परिचयपत्र वितरण गर्न सुरु गरेको छ । गाउँपालिकाले पालिका भित्र रहेका अपाङ्गता भएका व्यक्तिहरुको घरमै पुगेर परिचयपत्र वितरण गर्न सुरु गरेको हो ।
अधिकांस अपाङ्गता भएका व्यक्तिहरु कार्यालयमा आउन नसक्दा परिचय बनाउन समेत नसक्ने र सामाजिक सुरक्षा भत्ता प्राप्त गर्नबाट पनि बन्चित हुनुपर्ने भएकाले गाउँपालिकाले उनिहरुको घरसम्म पुगेर परिचयपत्र वितरण गर्दै आएको गाउँपालिकाकी उपाध्यक्ष इन्दिरा तिवारीले जानकारी दिईन ।
‘‘अपाङ्गता भएका व्यक्तिहरु कोही पनि राज्यले प्रदान गर्ने सेवा सुबिधाबाट बन्चित हुन नपरोस् भन्ने उद्देस्य गाउँपालिकाको रहेको छ, उपाध्यक्ष तिवारीले भनिन्, ‘‘घरमै पुगेर परिचयपत्र वितरण भएपछि लाभग्राही खुशी मात्र भएका छैन्न उनिहरुले स्थानीय सरकार भएको राम्रो अनुभूति पनि गर्न पाएका छन् ।’’
गाउँपालिकाले वडाहरुमा पालैपालो पुगेर अपाङ्गता भएका व्यक्तिहरुलाई परिचयपत्र वितरण गर्दै आएको छ । गाउँपालिकाले मंगलवार वडा नम्बर ४ मा ‘ख’ बर्गका १ जना, ‘ग’ बर्गका २ जना, वडा नम्बर ५ मा ‘क’ बर्गका २ जना, ‘ग’ बर्गका २ जना र ‘ख’ बर्गका ३ जना गरी कुल १० जनालाई परिचय वितरण गरेको जनाएको छ ।
अपाङ्गता परिचयपत्र वितरणका लागि मेडिकल रिर्पोट पनि आबश्यक पर्ने भएकाले चिकित्सक तथा पालिकाका अन्य कर्मचारी सहितको टोली लिएर अपाङ्गता भएका व्यक्तिहरुको घरघरमा पुग्ने गरेको उनले बताईन । ‘‘मेडिकल रिर्पोट बिना परिचय पत्र वितरण गर्नै मिल्दैन, उनले भनिन्, त्यसका लागि चिकित्सक पनि संगसंगै लिएर जाने गरेका छौ ।’’
गाउँपालिकाले वडा कार्यालय मार्फत पालिका भित्रका रहेका प्रत्येक वडाका अपाङ्गता भएका व्यक्तिहरुको तथ्याङ्क संकलन गरेको र सोही तथ्याङ्क अनुसार वडा कार्यालयको सिफारिस र मेडिकल रिर्पोट समेतका आधारमा परिचय वितरण गर्दै आएको छ ।
गाउँपालिकाकाकी उपाध्यक्ष इन्दिरा तिवारीको संयोजकत्वमा रहेको परिचय पत्र वितरण गर्ने टोलीमा पालिका स्वास्थ्य शाखाका प्रमुख बिरेन्द्र श्रेष्ठ सहित डा.आयुस भण्डारी लगायत पालिकाका अन्य कर्मचारीहरुको संलग्न समेत सहभागीता रहेको थियो ।