चितवन । भरतपुर महानगरपालिका–७ बस्ने मनकुमारी वाग्लेको हत्या गरी फरार रहेका सोही महानगरपालिका–२८ बस्ने ४३ वर्षीय कृष्ण भन्ने तोयानाथ चापागाईलाई प्रहरीले १९ बर्ष पछी पक्राउ गर्न सफल भएको छ । साधुको भेषमा नवरवपुरको एक मन्दिरबाट चापागाईलाई सोमबार साँझ प्रहरीले पक्राउ गरेको हो ।
चापागाईले २०६१ मंसिर १४ गते हजुरआमा पर्ने मनकुमारीलाई बाँसको लौरो र ढुंगा प्रहार गरी हत्या गरेर फरार भएको चितवन प्रहरीले जानकारी दिएको छ । हत्या पश्चात चापागाईले हजुरआमाको कानमा लगाएको गरगहना समेत लुटी भाग्न सफल भएका थिए ।
चितवन प्रहरीलाई विशेष सूचनाको आधारमा जिल्ला प्रहरी कार्यालय चितवन र ईलाका प्रहरी कार्यालय बर्दघाट नवलपरासी पश्चिमबाट खटिएको प्रहरीहरुको टोलीले फरार चापागाईलाई नवलपरासी पश्चिम वर्दघाट नगरपालिका–४ बाढीपीडितस्थित शिव मन्दिरमा भेष बदलेर बसेको अवस्थामा फेला पारेका थिए ।
उनलाई साधुको भेषमा लुकिछिपी बसेको अवस्थामा फेला पारी पक्राउ गरीएको चितवन प्रहरीले जानकारी दिएको हो ।
पक्राउ परेका चपागाईका सम्बन्धमा प्रहरीले थप अनुसन्धान सुरु गरेको जनाएको छ ।