काठमाडौं । काभा पुरुष भलिबल च्यालेन्ज कपमा नेपालको राष्ट्रिय भलिबल टिमले आयोजक श्रीलंकासँग खेल्दैछ । बंगलादेशलाई हराउँदै प्रतियोगितामा शानदार सुरुआत गरेको नेपालले आज मंगलबार श्रीलंकासँग खेल्न लागेको हो ।
कोलम्बोमा जारी प्रतियोगिता अपरान्ह ४:१५ बजे सुरु हुनेछ । एसियन गेम्स खेलेर फर्किएको नेपालको भलिबल टिम प्रतियोगितामा लयमा देखिएको छ ।
आईतबार नेपालले बंगलादेशलाई ३–१ को सेटमा हराएर सुखद सुरुआत गरेको छ । बंगलादेशमाथि ५ वर्षपछि जित निकाल्ने क्रममा नेपालले २५–२०, १९–२५, २५–२३, २५–२१ को सेटमा जित निकाल्यो ।
नेपालले प्रतियोगिताको तेस्रो खेलमा बुधबार अफगानिस्तानसँग खेल्नेछ ।