गोरखा । गोरखा सदरमुकामको बाह्रकिलो बजारमा प्रहरीलाई गाली गरेको आरोपमा १ जना युवक पक्राउ परेका छन् । पक्राउ पर्ने युवक गोरखा नगरपालिका–११ को तेह्रकिलो (घुम्ती बजार) बस्ने सुवास थापा भएको जिल्ला प्रहरी कार्यालय गोरखाले पुष्टी गरेको हो ।
पक्राउ परेका थापाले गस्तीमा रहेको प्रहरीलाई गालीगलौच गरेको भन्दै नियन्त्रणमा लिएको जिल्ला प्रहरी कार्यालय गोरखाका प्रहरी नायब उपरिक्षक तथा सूचना अधिकारी रमेशकुमार श्रेष्ठले जानकारी दिए । श्रेष्ठका अनुसार थापाले बाह्रकिलो बजार क्षेत्रमा रहेको होटल र फलफुल पसलमा भएका खाने कुरा खाने र पैसा नतिर्ने गरेको सूचनाको आधारमा गस्ती गएको प्रहरीले सम्झाई बुझाई गर्न खोज्दा उल्टै प्रहरीलाई गालीगलौच गरेपछि नियन्त्रणमा लिएको हो ।
थापाले विगत होटलहरुमा खाना खाई पैसा नदिई धम्क्याउने तथा सोही स्थानमा रहेको फलफुल पसलहरुमा गई पसलका मानिसहरुलाई अनावश्यक रुपमा धम्क्याउने समेतको गरेको प्रहरीले जानकारी दिएको छ ।
प्रहरीको निग्रानीमा पर्दै आएका थापाले असोज १४ गतेका साँझ ७ः३० बजेको समयमा सोही स्थानको फलफुल पसलमा रहेको फलफुल फाली फलफुल धनीलाई उल्टै धम्काई अशान्ती मच्चाई रहेको अवस्थामा प्रहरी चौकी बाह्रकिलो प्रहरी टोलीले थापालाई नियन्त्रणमा लिएको थियो ।
थापाले उक्त समयमा प्रहरी माथी अपशब्दहरु प्रयोग गरी गाली गलौज गरी धाक–धम्की दिनुका साथै हातपात समेत गर्न खोजेको सूचना अधिकारी श्रेष्ठले बताए ।
पक्राउ परेका थापा बिरुद्व असोज १५ गते सोमबार सार्वजनिक शान्ती बिरुद्धको कसूर मुद्दा शिर्षकमा मुद्दा दर्ता गरी जिल्ला प्रशासन कार्यालय गोरखाबाट म्याद थपगरी प्रहरीको हिरासतमा राखेर अनुसन्धान अगाडी बढाईएको गोरखा प्रहरीले जानकारी दिएको छ ।