गोरखा । पछिल्लो १ महिनामा गोरखा बजारबाट मोटरसाइकल चोरीको ६ घटना घटे । ६ घटनामा चोरले अधिकांश पल्सर मोटरसाइकल चोरी गरेको तथ्य पुष्टी भएको छ ।
चोरीको घटना घटेको भन्दै गोरखा प्रहरीले विशेष अप्रशेन चलाएको दोस्रो दिनमा नै फेरी सदरमुकामको ठिगुरेश्वाराबाट अर्को पल्सर मोटरसाइकल चोरी भएको छ ।
गोरखा नगरपालिका–९ को ठिगुरेश्वाराबाट शुक्रबार बिहान २ बजेको समयमा बा. ३७ प ९१४३ नम्बरको २२० सिसीको पल्सर चोरले चोरी गर्न सफल भएको हो ।
उक्त मोटरसाइकल मिलन उपरकोटीको नाममा भएको भएता पनि खदिर गरेर ठिगुरेश्वाराका प्रविन उपरकोटीले चलाउदै आएको थियो । पिडित प्रबिनका अनुसार बिहान २ बजेको समयमा मोटरसाइकल चोरी भएको थियो ।
घटना लगत्तै गोरखा प्रहरीलाई जानकारी गराइएको र खोजी गर्ने क्रममा उक्त मोटरसाइकल चोरहरुले ठिगुरेश्वाराबाट लक्ष्मी बजार तर्फ लगेको देखिएता पनि उक्त मोटसाइकल लक्ष्मी बजार पुग्नु अगावै गायव भएको सिसीक्यामेरामा देखिन्छ ।
चोरी भएको स्थानमा अन्य मोटरसाइकल र स्कुटीहरु पनि पार्किङ गरेर राखिएको भएता पनि चोरले पल्सर मोटरसाइकल नै उठाएर लगेका थिए ।
चोरी भएको जानकारी पाए लगत्तै प्रहरीले ब्यापक रुपमा प्रहरी परिचालन गरी खोजी गरिरहेको जिल्ला प्रहरी कार्यालय गोरखाका प्रहरी नायब उपरिक्षक रमेशकुमार श्रेष्ठले बताए । उनका अनुसार यस भन्दा अगाडी पनि सदरमुकाम क्षेत्रबाट अन्य ५ मोटरसाइकल महिना दिनभित्रै चोरले उठाएर लान सफल भएका थिए ।