फाईल तस्बिर
गोरखा । नेपालीहरुको महान चाड दशैं नजिकिए संगै गाउँगाउँमा खेलकुद प्रतियोगिता आयोजना गर्न थालिएको छ । दशैंलाई रमाइलो बनाउन र गाउँमा पर्यटक भित्राउन भन्दै ‘तेस्रो अजिरकोट भलिबल कप २०८०’ को आयोजना गरिएको छ ।
गोगनपानी युवा क्लबको आयोजनामा हुने उक्त प्रतियोगिता कार्तिक १ गते बुधबारबाट हुदै छ । जसका लागि आयोजक टिमले तयारी थालेको मुल समारोह समिति संयोजक मोहन गुरुङले जानकारी दिए।
प्रतियोगिता अजिर गाउँपालिका–४ को सिम्जुङको गोगनपानीमा अवस्थित गोगनपानी युवा क्लबको खेलमैदानमा हुने आयोजक संस्थाले जानकारी दिएको छ । प्रतियोगिताले गाउँपालिका भित्र रहेका युवाहरूलाई खेलकुद प्रति आकर्षित गराई व्यवासायीक खेलाडी तयार गर्न सहयोग पुग्ने विश्वास क्बलले लिएको छ । त्यस बाहेक पनि क्लबले प्रतियोगिताबाट स्थानीय स्तरमै सक्षम तथा स्तरीय खेलाडी तयारगरी जिल्ला, प्रदेश हुदै राष्ट्रिय स्तरमा प्रतिस्पर्धा गराउन सहयोग पुग्ने लक्ष्य लिएको छ ।
अघिल्लो दुई संस्करण सफलता पूर्वक सम्पन्न गरेको ‘दशै कप भलिबल प्रतियोगिता’को नाम यस पटकबाट परिवर्तन गरेर ‘तेस्रो अजिरकोट भलिबल कप २०८०’ राखिएको पनि आयोजक संस्थाले जानकारी दिएको छ । ‘गोगनपानी युवा क्लबको शान, समग्र अजिरकोट गाउँपालिकाको खेलकुद सङै पर्यटन बिकास गराउने हाम्रो अभियान’ भन्ने नारा दिएको प्रतियोगितामा गोरखा, तनहुँ, लमजुङ र कास्की जिल्लाको १२ टोलीको सहभागीता रहनेछ ।
प्रतियोगितामा पहिलो हुनेले ३0 हजार नगद सहित ट्रफि, मेडल र प्रमाणपत्र प्राप्त गर्ने छ भने उपबिजेताले नगद २० हजार सहित ट्रफि, मेडल र प्रमाणपत्र प्राप्त गर्ने संयोजक गुरुङले जानकारी दिए ।
त्यस बाहेक पनि प्रतियोगितामा सर्बोत्कृष्ट खेलाडीलाइ ३ हजार सहित ट्रफि प्रदान गरिने छ । हरेक खेलमा म्यान अफ दि म्याच घोषणा गरिने र अजिरकोट गाउँपालिकाको पर्यटकिय गन्तव्य समेटिएको चित्र सहितको मायाँको चिनो प्रदान गरिनेछ ।
प्रतियोगिता समापनको दिनमा स्थानिय कला र संस्कृतिको संरक्षण र सम्बर्धन गर्ने उद्धेश्यले सॅास्कृतिक कार्यक्रमको राखिएको पनि संयोजक गुरुङले जानकारी दिए ।