साँकेतिक तस्बिर
गोरखा । उत्तरी गोरखाको मान्बुमा एक महिला मृत्त फेला परेकी छिन । महिलाको मृत्यु शंकास्पद देखिएपछी आज जिल्ला प्रहरी कार्यालय गोरखाबाट अनुसन्धानकालागी प्रहरी घटना स्थल पुगेको छ ।
आरुघाट गाउँपालिका–१ मान्बुको श्यामचेतमा बस्दै आएकी लनम कान्छी नामले परिचित ६९ वर्षीया सुनमाया लामा झुण्डीएको अवस्थामा फेला परेकी हुन् । प्रहरीले घटनाका बारेमा शनिरबार बिहान १० बजेमात्र जानकारी पाएको थियो ।
झुण्डीएको अवस्थामा फेला परेकी ति महिला घरमा एक्लै बस्दै आएकी थिइन । मृत्तक महिलाको शरिरको तल्लो भागको कपडा खुल्लै अवस्थामा र कान च्यातिएको अवस्थामा फेला परेको जिल्ला प्रहरी कार्यालय गोरखाका प्रहरी नायब उपरिक्षक तथा सूचना अधिकारी रमेशकुमा र श्रेष्ठले बताए । ‘हामीले पनि घटना भएको ढिला गरी सूचना पायौं’ उनले भने ‘घटना अनुसन्धानका लागि आजै प्रहरी निरिक्षक सहितको टोली घटना स्थल तर्फ पठाइएको छ ।’
महिलाको मृत्युका बारेमा बजारमा विभिन्न थरीका हल्ला चलिरहेको छ । प्रनाउ श्रेष्ठले महिला आफै झुण्डीइन वा अरुले हत्या गरेर झुण्डाए भन्ने कुरामा पनि हामीले गहन अनुसन्धान गरीरहेको बताए । ‘महिलाको मृत्युका सम्बन्धमा अहिले नै बोलीहाल्ने अवस्था नरहेको’ भन्दै प्रनाउ श्रेष्ठले भने ‘कहिले मृत्यु भएको भन्ने कुरा समेत पोष्टमार्टम नगरी भन्न नसकिने अवस्था छ ।’
महिलाको कान च्यातिएका कारण उनले लगाएको गहना चोरी भएको समेत हुन सक्ने अनुमान प्रहरीले गरेको छ । तर पनि अनुसन्धान नभइकन यसै हो भन्ने अवस्था भने नभएको पनि प्रनाउ श्रेष्ठले बताए । ‘अनुसन्धानको दायरालाई फराकिलो बनाएर हामीले अनुसन्धान थालेका छौ’ प्रनाउ श्रेष्ठले भने ‘अनुसन्धान रिर्पोट र पोष्टमार्टम रिर्पोट हातमा नपर्दासम्म यही हो भन्ने अवस्थामा छैन ।’
उनी संगै उनका दाजु पनि बस्ने भएता पनि दाजु घरमा नभएको अवस्थामा उक्त घटना भएकाले पनि घटना शंकास्पद बस्दै गएको छ । शवको आरुघाट स्वास्थ्य चौकीबाट गएको चिकित्सकहरुले पोष्टमार्टम गरेर उनका आफन्तलाई बुझाएको गोरखा प्रहरीले जानकारी दिएको छ ।