गोरखा । नेपाल टेलिकमको नेटवर्कमा देखिएको समस्याले उत्तरी गोरखाको अजिरकोट गाउँपालिका र बारपाक सुलिकोट गाउँपालिका भित्रका बिभिन्न क्षेत्रका उपभोक्ताहरुले हैरानी खेप्दै आएका छन् ।
गएको दुईमहिना भन्दाबढी समयदेखि त्यस क्षेत्रका उपभोक्ताहरुले नेटवर्कको समस्याका कारण मोवाइलको कल तथा इन्टरनेट सेवा राम्रोसंग सुचारु नहुँदा कठिनाई भोग्दै आउनु परेको हो ।
जिल्लाको उत्तरपश्चिम अजिरकोट गाउँपालिकाको भच्चेकमा रहेको टेलिकमको टावरमा आएको समस्याका कारण टेलिकमको मोवाइल सेवा तथा इन्टरनेट दुरुस्त नचल्ने गरेको बारपाक सुलिकोट गाउँपालिकाका जीतबहादुर नेपालीले जानकारी दिए । ‘भच्चेकमा राखिएको नेपाल टेलिकमको टावरबाट बारपाक सुलिकोट गाउँपालिका बिभिन्न क्षेत्रमा टेलिकमको फोरजी सेवा पुगेको छ, उनले भने, ‘अहिले टावरमा आएको समस्याले राम्रोसंग इन्टरनेटले काम गरेको छैन ।’
नेटवर्कमा आएको खरावीका कारण मोवाइल कल गर्दा समेत कुरा नबुझिने, फोन गर्दागर्दै काटिने समस्या भएको स्थानियको गुनासो रहेको छ । टेलिकमको टावरमा आएको समस्याले हैरानी खेप्नु परेको अधिकांस उपभोक्ताहरुको भनाई छ ।
कुराकानी गर्दा मोवाइल फोनमा आवाज नसुनिने समस्या समेत रहेको अजिरकोट गाउँपालिका–३, भच्चेकका स्थानीबासी हरीप्रसाद देवकोटाले बताए । ‘मोवाइल छ तर कुरा गर्न परेको बेला काम परेको बेला कुराकानी गर्न नै गाह्रो हुन्छ, उनले भने, ‘फोन गर्दा फोन नै लाग्न गाह्रो र फोन लागे कुराकानी नै बुझ्न समस्या हुने गरेको छ ।’
