गोरखा । आरुघाट गाउँपालिकामा आज सार्वजनिक बिदा दिईएको छ । वडा सदस्यको हिजो अचानक मृत्यु भएपछी शोक मनाउन बुधबार पालिकाले सार्वजनिक बिदा दिएको हो ।
पालिकाले सूचना जारी गर्दै वडा नम्बर ९ का वडा सदस्य शंकर माझीको भाद्र १२ गते असामयिक निधन भएपछी बुधबार पालिका, वडा कार्यालय, बिद्यालय तथा मातहतका कार्यालयहरुलाई शोक बिदा दिएको जनाएको छ ।
जारी सूचनामा ‘आरुघाट गाउँपालिका वडा नं. ९ का वडा सदस्य श्री शंकर माझीको मिति २०८० भाद्र १२ गतेका दिन असामयिक निधन भएको खबरले हामी आरुघाट गाउँपालिका परिवार अत्यन्त मर्माहत भएका छौ’ भन्दै ‘यस दुःखद घडिमा परिवारजन प्रति गहिरो समवेदना प्रकट गर्दै मृत्त आत्माको चिर शान्तिको कामना सहित हार्दिक श्रद्वाञ्जली ब्यक्त गर्दछौ’ भनिएको छ ।
गाउँपालिका अध्यक्ष राजु गुरुङद्वारा हस्ताक्षरित सूचनामा ‘यस शोकको घडिमा आरुघाट गाउँपालिकाको कार्यालय, वडा कार्यालय, विद्यालय तथा मातहतका कार्यालयहरुमा मिति २०८० भाद्र १३ गते बुधबारका दिन शोक बिदा दिइएको ब्यहोरा जानकारीको लागि यो सूचना प्रकाशित गरिएको छ’ भनिएको छ ।
वडा सदस्य माझी भाद्र १२ गते साँझपख साथीहरु संग अरिगल पोल्ने क्रममा रुखबाट लडेर ढुङ्गामा बजारीदा घटना स्थलमा नै मृत्यु भएको गाउँपालिकाका उपाध्यक्ष कल्पना नेपालीले जानकारी दिईन । मृत्तक माझी गएको स्थानिय चुनावमा नेपाली काँग्रेसबाट वडा सदस्यमा बिजयी भएका थिए ।
