जगत प्रहरी पाेष्टबाट उत्तरी गाेरखामा जाने सामाग्री चेक जाँच गर्दै नेपाल प्रहरी
गोरखा । उत्तरी गोरखाको चुमनुब्री गाउँपालिकालाई यसै महिनादेखी सिसा मुक्त क्षेत्र घोषणा गरिएको छ । जसका लागि पालिकाले सरोकारवाल सरकारी तथा अन्य निकाय संग छलफललाई तिब्रता दिएको अध्यक्ष निमा लामाले बताए ।
यस अघिको गाउँपालिकाको सभाबाट समेत एक मतले पारीत गरेको सिसा मुक्त अभियानलाई कडाईका साथ पालना गर्न लगाउने पालिका अध्यक्ष लामाले बताए । ‘गाउँ, बजार, हिमाल तथा चरन क्षेत्रमा समेत सिसाले समस्या देखियो’ अध्यक्ष लामाले भने ‘गाउँपालिकाको सभाबाट समेत पारित भई सकेकोले सरोकारवाला सरकारी तथा ब्यक्ति र संघ संस्था संग समन्वय गरेर प्रतिबन्ध लगाउछौ ।’
उक्त क्षेत्रमा बिशेष गरेर बियरका बोतलहरुले समस्या ल्याएको उनले बताए । ‘चरन क्षेत्रमा झनै समस्या ल्यायो । सयौ बर्षसम्म पनि नकुहिने भएका कारण अबदेखी बियरलाइ लानेले क्यानमा मात्र लान पाउने’ भन्दै अध्यक्ष लामाले भने ‘यस क्षेत्रका र तलका ब्यापारीहरुलाई सिसाका बियर नपठाउन भनिएको छ ।’
यसै महिनाको अन्तिमबाट लागु गर्न लागिएको यो अभियानका लागि कडाईका साथ पालना गराउन पालिकाले नेपाल प्रहरी संगको समन्वयमा जगतमा रहेको प्रहरी चौकीलाई चेक जाँच गरेर फेला पारे बरामद गर्न भनेको छ । उता मनाङ र चिन संग जोडिएको सिमामा भने समस्या नभएको अध्यक्ष लामाले जानकारी दिए । अबदेखी उक्त क्षेत्रमा बियर लानु परेमा क्यान वा प्लाष्टिकका बोतलमा मात्र लान पाइने छ ।
उक्त क्षेत्रलाई सिसा मुक्त बनाउन पालिकाले त्यस क्षेत्रभित्र रहेको ब्यापारी तथा होटलवालाहरुलाई समेत अब आईन्दा सिसा वाला बियर आयात नगर्न भनेको छ । ब्यापारी तथा होटलवालाहरुले पनि सफा र सुन्दर पालिका निर्माणमा सहयोग गर्ने प्रतिबद्वता सहित सिसावाला बियर आयात नगर्ने प्रतिबद्वता जनाएको गाउँपालिकाका अध्यक्ष लामाले जानकारी दिए ।
यो क्षेत्रमा विश्व चर्चित मनास्लु हिमाल, ऐतिहासिक तथा पुरातात्विक गुम्बा तथा संरक्षित क्षेत्र समेत रहेको हुदाँ उक्त क्षेत्रमा जाने पर्यटकले प्रयोग गर्ने पेय पदार्थका सिसाका बोतल अहिले पनि असरल्ल देख्न सकिन्छ ।
यो अभियानमा नेपाल प्रहरी, मनास्लु संरक्षण क्षेत्र आयोजना, जनप्रतिनिधी, ब्यापारी र होटल सञ्चालकले सहयोग गर्ने अध्यक्ष लामाले बताए । त्यसका साथै केही समय भित्रै नेपाल र चिनको सिमानामा स्थापना हुन लागेको शसत्र प्रहरीको बिओपीले पनि यो कार्यको लागि सहयो गर्ने उनले बताए ।
पालिकाले साउन ३१ गते एक सूचना जारी गर्दै ‘चुमनुब्री गाउँपालिकालाई २०८० भाद्र मसान्त भित्र सिसाजन्य सामाग्रीहरुको प्रयोगमा प्रतिबन्ध गरिने’ भन्दै ‘उद्योगी, ब्यापारी, ब्यवसायी तथा आम सर्व साधारणमा अपिल’ समेत गरेको छ । पालिकाले ‘चुमनुब्री गाउँपालिकालाई सिसामुक्त बनाई सफा र सुन्दर गाउँपालिका निर्माणको महान अभियानमा सहयोग पुरर्यान’ समेत पालिकाले अनुरोध गरेको छ ।
सो क्षेत्रमा रहेको सिसाको बोतल संकलन तथा निर्यातका लागि भने पालिकाले संघ संस्था संग समन्वय गरी रहेकोले केही समय भित्रै त्यसको निक्यौल गरी संकलन पश्चात बाहिरी क्षेत्रमा निर्यात गरीने प्रमुख प्रशासकिय अधिकृत भीमसेन श्रेष्ठले जानकारी दिए ।