साँकेतिक तस्बिर
गोरखा । गोरखामा २ साता यता आँखा पाक्ने रोग महामारीको रुपमा फैलिएको छ । आँखा पाक्नेहरुमा बिद्यार्थीहरुको संख्या अधिक रहेको स्वास्थ्य कार्यालय गोरखाका महामारी फोकल पर्सन नारायणबावु अर्यालले जानकारी दिए ।
११ स्थानिय तह रहेको गोरखामा सबै पालिकामा आँखा पाक्ने रोग फैलिएको छ । बुधबारसम्म जिल्लामा ३ हजार ३८१ जना रोगी फेला परेको पनि फोकल पर्सन अर्यालले बताए । ‘जिल्लाको सबै स्थानिय तहमा आँखा पाक्ने रोग देखिएको छ’ उनले भने ‘सबैभन्दा बढी चाही स्कुले बिद्यार्थीहरुमा देखिएको छ ।’
आँखा पाक्ने रोग सबैभन्दा बढी गोरखा नगरपालिकामा देखिएको छ । नगर क्षेत्र भित्र मात्रै करिब २ हजार मानिसमा देखिएको छ । कार्यालयले उपलब्ध गराएको रेकर्ड अनुसार १ हजार ७११ जनामा आँखा पाक्ने रोग देखिएको छ ।
लायन्स आँखा अस्पतालमा उपचार गराउन आएका १ हजार ३९४ र गोरखा नगरपालिकामा ३१७ जनामा त्यस्ता रोगी फेला परेको स्वास्थ्य कार्यालय गोरखाले जनाएको छ । उता पालुङटार नगरपालिकामा ८५० जना र सिरानचोक गाउँपालिकामा ३१० जनामा रोग देखिएको पनि कार्यालयले जानकारी दिएको छ ।
त्यस्तैगरी, बारपाक सुलिकोट गाउँपालिकामा १५४ जना, गण्डकीमा १२४ जना, भीमसेन थापामा १०५ जना रोगी फेला परेको छ । त्यस्तै धार्चेमा ४१ जनामा, आरुघाट र अजिरकोटमा २६÷२६ जना, चुम नुब्रीमा १९ जना र शहिद लखन गाउँपालिकामा १५ जना रोगी फेला परेको पनि कार्यालयका फोकल पर्सन अर्यालले जानकारी दिए ।
यो संख्या सरकारी र लायन्स आँखा अस्पतालमा फेला परेको मात्र भएको पनि उनले बताए । निजी स्वास्थ्य संस्थामा र जिल्ला बाहिर गएर उपचार गराएको संख्या भने यसमा समावेश नगरीएको पनि उनले जानकारी दिए ।
