गोरखा । खातामा पर्याप्त रकम नै नभई घोराही सिमेन्टको आइपिओमा आवेदन दिनेहरूको नाम बाहिरिएको छ ।
स्रोतका अनुसार गोरखाकी सावित्रा पराजुली, रुपन्देहीकी लक्ष्मी घिमिरे, मोरङकी मुना खत्री र चितवनका मनोज पाठकले यसरी खातामा पर्याप्त पैसा नै नभई आवेदन दिएका हुन् । यी व्यक्तिहरूले १० लाख कित्ताको दरमा आवेदन दिएका हुन् ।
खातामा पर्याप्त रकम नभई १० लाख कित्तासम्म आवेदन दिने अन्यमा सुनसरीका मिथिलेशकुमार मेहता, दोलखाकका नवीन खत्री, ललितपुरका अनिल राना, पर्वतकी रञ्जना ढकाल पौडेल र काठमाडौंको मध्य बानेश्वरकी सुमित्रा बम रहेका छन् ।
फर्जी आवेदन दिएर आइपिओमा लगानीकर्ताहरूको आकर्षण रहेको देखाउने प्रयास भएको आशंकामा धितोपत्र बोर्डले सोमबार नै आइपिओ तत्काललाई स्थगन गरेको छ ।
धितोपत्र बोर्डले कम्पनीको रेटिङ र सेयर प्रत्याभूतिकर्ताका बारेमा पनि अध्ययन गर्ने बताएको छ ।
कम्पनीले प्रिमियम सहित प्रतिसेयर ४३५ रुपैयाँका दरले आइपिओ बिक्री गरिरहेको थियो । सर्वसाधारणको लागि कम्पनीले ६९ लाख ११ हजार ६७० कित्ता सेयर निष्कासन गरेको हो ।
कम्पनीलाई केयर रेटिङ नेपालले ुकेयर एनपी ट्रिपल बी माइनस इस्युअर रेटिङु प्रदान गरेको छ । यसले कम्पनीको दायित्व बहन गर्ने क्षमतामा मध्यम जोखिम रहेको जनाउँछ ।
कम्पनीको सेयर बिक्री प्रबन्धकहरूमा हिमालय क्यापिटल र नबिल इन्भेष्टमेन्ट बैंकिङ रहेका छन् । बिक्री प्रबन्धकले नै सेयर प्रत्याभूति गरेका हुन्छन् । सेयर प्रत्याभूतिकर्ताले बिक्री नभएको सेयर सकार्नु पर्छ ।