गोरखा । गोरखामा मरेका मानिसका नाममा करिब १८ लाख रुपैयाँ सामाजिक सुरक्षा भत्ता निकासा भएको रहस्य खुलेको छ । जिल्लाको ९ वटा स्थानिय तहले १४३ जना मरेका मानिसका नाममा सामाजिक सुरक्षा भत्ता निकासा गरेको खुलासा भएको हो ।
महालेखा नियन्त्रकको कार्यायलले उक्त कुराको पुष्टी गरेको हो । जिल्लाको चुम नुब्री र बारपाक सुलिकोट गाउँपालिका बाहेकका अरु सबै पालिकाले ४ जनादेखी ३४ जनासम्मको सामाजिक सुरक्षा भत्ता निकासा गरेको महालेखाले जनाएको छ ।
सबैभन्दा बढी गोरखा नगरपालिकाले मरेका मानिसको नाममा भत्ता निकासा गरेको देखिएको छ । महालेखाले जनाए अनुसार गोरखा नगरपालिकाले ३४ जनाको नाममा ४ लाख १८ हजार रुपैयाँ सामाजिक सुरक्षा भत्ता निकासा गरेको खुलेको हो ।
मरेको मानिसको नाममा सामाजिक सुुरक्षा भत्ता निकासा गर्ने दोस्रो स्थानमा पालुङटार नगरपालिका रहेको छ । उसले २६ जनाको नाममा ३ लाख १६ हजार १३१ रुपैयाँ निकासा गरेको पुष्टी भएको छ । महालेखाले सबै रकम सम्वन्धीत सबैबाट असुल गरेर दाखिला गर्न पनि भनेको छ ।
महालेखा नियन्त्रकको कार्यालयले त्यस्तो रकम सम्वन्धीत पक्षबाट असुल उपर गरी यथासिघ्र संघीय संचित कोषमा दाखिला गर्न समेत भनेको छ । सामाजिक सुरक्षा भत्ता नियमावली २०७६ को नियम १३ मा मृत्यु भएकाको नाममा निकासा गरेको सामाजिक सुरक्षा भत्ता सम्वन्धितहरुबाट असुल उपर गरी संघिय सञ्चित कोषमा दाखिला गनुपर्ने ब्यवस्था गरेको छ ।
उता गण्डकी गाउँपालिकाले मरेकै मानिसको नाममा २ लाख ५२ हजार निकासा गरेको छ । महालेखाले जनाए अनुसार गण्डकीले २३ जनाको नाममा सामाजिक सुरक्षा भत्ता निकासा गरेको देखिन्छ ।
त्यस्तै गरी भीसेन थापा गाउँपालिकाले १४ जनाको नाममा ३ लाख ६८ हजार २६८ रुपैयाँ, आरुघाट गाउँपालिकाले १३ जनाको नाममा २ लाख ५० हजार ६०० रुपैयाँ, शहिद लखन गाउँपालिकाले १२ जनाको नाममा १ लाख ३१ हजार र सिरानचोक गाउँपालिकाले १२ जनाको नाममा ९९ हजार निकासा गरेको देखिएको छ ।
अजिरकोट र धार्चेले भने क्रमश. ५ र ४ जनाको नाममा ३९ हजार र १९ हजार निकासा दिएको महालेखाले जनाएको छ । महालेखाका अनुसार गोरखाको ९ वटा स्थानिय तहले १३४ जनाको नाममा १७ लाख ९२ हजार ८६० रुपैयाँ निकासा भएको प्रमाणित गर्दै तत्कालै सम्वन्धितबाट असुल उपर गरी कोषमा रकम जम्मा गर्न निर्देशन समेत जारी गरेको छ ।