मनाङ । मनाङबाट प्रदेश सभा ‘ख’ बाट स्वतन्त्र उम्मेदवारी दिएका राजीव गुरुङ उर्फ दीपक मनाङे निर्विरोध निर्वाचित भएका छन् । मनाङको प्रदेश सभा निर्वाचन ‘ख’बाट प्रदेश सभा सदस्यका लागि उनी निर्विरोध निर्वाचित भएका हुन् ।
गण्डकी प्रदेशका युवा तथा खेलकुदमन्त्री समेत रहेका मनाङेसँगै दोर्जे लामाले पनि उम्मेदवारी दिएका थिए । लामाले उम्मेदवारी फिर्ताका लागि निवेदन दिएका छन् । लामाको उम्मेदवारी फिर्ता भए संगै मनाङे निर्विरोध भएका हुन् ।
लामाले उम्मेदवारी फिर्ताका लागि निवेदन दिएको मनाङका मुख्य निर्वाचन अधिकृत उत्तम सिलुवालले बताए । उनका अनुसार उम्मेदवारी फिर्ताको निवेदन दिएपछि मनाङे प्रदेश सभामा एक्लो उम्मेदवार बनेका छन् । मनाङेको मात्र उम्मेदवारी कायम रहेको र प्रक्रिया पूरा गरेर उनलाई निर्विरोध घोषणा गर्न बाँकी रहेको मुख्य निर्वाचन अधिकृत उत्तम सिलुवालले बताए ।
कांग्रेस र एमाले दुवैले मनाङेलाई समर्थन गर्दै उम्मेदवारी दिएका थिएनन् । मनाङले शुरूमा सत्ता गठबन्धनको समर्थनमा चुनाव लड्ने तयारी गरेका थिए । तर, अन्तिम समयमा उनले गठबन्धन छाडेको घोषणा गरेका थिए । उनले गठबन्धन छाडेको घोषणा गरेपछि एमालेको समर्थनमा उम्मेदवारी दिने बताएका थिए । एमालेले पनि उनीविरुद्ध उम्मेदवार दिएको थिएन । मनाङेको विश्वासमा परेका सबै दल उक्त प्रदेश सभामा उम्मेदवारविहीन बनेका हुन् ।
मनाङे २०७४ मा पनि स्वतन्त्र उम्मेदवार थिए । त्यसबेला उनले एमालेको समर्थन चुनाव जितेका थिए । एमाले सरकारमा उनी युवा तथा खेलकुदमन्त्री बनेका थिए । तर, पार्टीको आन्तरिक विवादका बेला भने उनले एमालेका मुख्यमन्त्री पृथ्वीसुब्बा गुरुङलाई समर्थन गरेनन् । उनकै कारण गण्डकी प्रदेशमा एमालेको सरकार ढलेको थियो । उनी सत्ता गठबन्धनको सरकारमा पनि युवा तथा खेलकुद मन्त्री बनेका थिए ।
यसपटकको निर्वाचनमा निर्विरोध निर्वाचित हुने उनी हालसम्म पहिलो र एकमात्र उम्मेदवार बनेका छन् ।
