काठमाण्डौं । अजय सुमार्गीको नेपाल स्याटेलाइट टेलिकम प्रालि (हेलो नेपाल)को अनुमतिपत्र अन्तत खारेज गरिएको छ ।
नेपाल सरकारले दिएको समयभित्र बक्यौता नतिरेपछि दूरसञ्चार क्षेत्रको नियामक नेपाल दूरसञ्चार प्राधिकरणले हेलो नेपालको अनुमतिपत्र खारेज गरीदिएको हो ।
शुक्रबार बसेको प्राधिकरण बोर्डको बैठकले हेलो नेपालको आधारभूत दूरसञ्चार सेवाको अनुमतिपत्र खारेज गर्ने निर्णय गरेको प्राधिकरणले जनाएको छ ।
व्यवसायी अजय सुमार्गीको स्वामित्वमा रहेको टेलिकम कम्पनीको अनुमतिपत्र खारेज गर्ने निर्णय भएको यो दोस्रो पटक हो । यसअघि १७ साउन २०७६ मा बक्यौता नबुझाएको भन्दै प्राधिकरणले यस कम्पनीको अनुमतिपत्र खारेज गर्ने निर्णय गरेको थियो ।
प्राधिकरणको उक्त निर्णयविरुद्ध सुमार्गीको कम्पनी नेपाल सरकारसमक्ष पुनरावलोकनका लागि दिएको निवेदन संगै मन्त्रिपरिषद्को २०७६ पुस २१ को बैठकले प्राधिकरणको उक्त निर्णयलाई उल्ट्याइदिएको थियो ।
साथै सरकारले कम्पनीले बुझाउनुपर्ने सबै किसिमको बाँकी बक्यौता ५ किस्तामा नबढ्ने गरी पहिलो किस्ता आर्थिक वर्ष २०७६–०७७ को असार मसान्तभित्रै र बाँकी ४ किस्तामध्ये प्रतिवर्ष एक किस्ताका दरले प्रत्येक आर्थिक वर्षको असार मसान्तभित्रै बुझाउने गरी समय दिएको थियो ।
तोकिएको समयभित्र बक्यौता नबुझाएको खण्डमा कानूनबमोजिम कारबाही गर्नसमेत प्राधिकरणलाई सरकारले भनेको थियो ।
सरकारले दिएको उक्त किस्ताबन्दीको सुविधाको आधारमा कम्पनीले बाँकी बक्यौता रकम नबुझाएपछि पुनः प्राधिकरणले अनुमतिपत्र खारेज गर्ने निर्णय गरेको हो ।
हेलो नेपालले बक्यौताको किस्ताबापत २०७८ असार मसान्तभित्र ३३ करोड ५८ लाख ४७ लाख ३०३ रुपैयाँ बुझाउनुपर्ने थियो ।