गोरखा । नेपालकै पहिलो मनकामना केबलकार संचालनमा आएको आज २३ वर्ष पूरा गरेर आजबाट २४ वर्षमा प्रवेश गरेको छ ।
चितवनको चेशरदेखी गोरखाको मनकामनासम्म रहेको केबलकारले यो अवधीमा १ करोड ५९ लाख ३७ हजार ६७९ जनालाई सफल यात्रा गराएको स्टेशन म्यानेजर उज्वल शेरचनले जानकारी दिए । ‘स्थापना देखी २३ बर्षको अवधीमा करिब १ करोड ६० लाख मानिसलाई हामीले सेवा दियौं’ भन्दै ‘यदी कोरोना महामारी नभएको भए २ करोड भन्दा बढी मानिसले यात्रा गर्ने थिए’ स्टेशन म्यानेजर शेरचनले भने ।
मनकामना दर्शन प्रालि मार्फत २०५५ साल मंसिर ८ गतेबाट संचालनमा आएको हो ।
केबलकार संचालनको लामो अवधी संगै अहिले एनालग कनेक्ट प्रणालीबाट केबलकार केही बर्ष भित्रै डिजिटल प्रणालीमा स्तरोरोन्नती गर्न लागिएको संचालक मध्येका राजेशबावु श्रेष्ठले बताए । ‘यो प्रणाली विश्वभर नै पुरानो हुन थाल्यो । हामी तत्कालै नयाँ प्रविधिमा जादै छौ’ उनले ‘एनालगबाट डिजिटलमा जाने सबै प्रकृया पुरा भएको र आगामी बर्ष भित्रै केबलबार डिजिटल प्रणाली मार्फत सञ्चालनमा आउने’ भने ।
अहिलेको प्रविधि अनुसारको विश्व बजारमा उपकरण पाउन समस्या हुन थाले पछी केबलकार नयाँ प्रविधिमा जान लागेको केबलकार प्रशासनले जनाएको छ ।
केबलकारमा भएका सामानहरु विभिन्न चरणमा परिवर्तन गरिने भएका कारण यात्रु तथा भक्तजनलाई कुनै समस्या नहुने स्टेशन म्यानेजर उज्वल शेरचनले बताए ।