गोरखा । ऐतिहासित तथा पुरातात्वीक गोरखाको कालिका मन्दिरमा रहेको दशै घर, गोरखानाथ गुफा र प्रसिद्व धार्मिक तिर्थ स्थल मनकामना मन्दिरमा बिधिपूर्वक जमरा राख्ने काम सम्पन्न भएको छ ।
बिहीबार बिहान ११ः४६ बजेको शुभसाईतमा दशैघर र गोरखनाथ गुफामा जौको जमरा राखिएको गोरखा दरबार हेरचाह अड्डाका प्रमुख हरिप्रसाद भुसालले बताए ।
परम्परा अनुसार गोरखा दरर्बारमा आज बिहान सवेरै साईतमा देवी भगवतीको सवारी गराएपछि शुभसाईतमा कालिका भगवतीको मन्दिर २ पाथी र गोरखनाथ गुफामा १ पाथी जौको जमरा राखिएको गोरखा दरर्बार हेरचाह अडले जानकारी दिएको छ ।
यसअघि मूल दरबारको कैलास कोठाबाट भित्रि बाटो हुदै देवी भगवतीका सवारी गराउने प्रचलन रहदै आएको भएपनि भुकम्पले मूल दरबारमा पूर्ण क्षति पुगेकाले कैलास कोठाको थापना गरी देवीको सवारी गराइएको कालिका मन्दिरका मूल पुजारी शारदाप्रसाद भट्टराईले बताए ।
जमरा राख्नुअघि मूलदरबारमा नै पानी घडी थापना गर्नुपर्ने प्रचलन रहेको भएपनि दरबार जिर्णेद्धारका लागि भत्काइएकाले नयाँ स्थानमा पानी घडी थापना गरी घटस्थापना गरिएको हो ।
गोरखाको गोरखकाली मन्दिरमा जमरा राखेपछि मात्र देशभरका हिन्दुधर्मालम्बीहरुले जमरा राख्ने धार्मिक मान्यता रहदै आएको छ ।
यस्तै गरी घटस्थापनाको दिन बिहान शुभसाईतमा गोरखाको मनकामना मन्दिरमा पनि जमरा राख्ने काम सम्पन्न भएको मन्दिरका मुल पुजारी इन्सानबहादुर थापाले बताए ।
मनकामना मन्दिरमा भने मकै र जौको छुट्टाछुट्टै जमरा राखिएको छ । परम्परा अनुसार नै छुट्टाछुट्टै जमरा राख्नु पर्ने भएका कारण सोही अनुसार नित्य पुजा गरि जमरा राखिएको मूलपुजारी थापाले जानकारी दिए ।
