गोरखा । सवारी साधानमा यात्रा गर्दा शरीरका इन्द्रीयहरु आँखा, कान आदिले सन्तुलित ढंगबाट आ–आफ्नो कार्य गर्न नसक्दा मोसन सिकनेस अर्थात यात्राजन्य वान्ता उत्पन्न हुनु स्वाभाविक नै हो ।
मोसन सिकनेस पनि व्यक्तिपिच्छे फरक–फरक हुन्छ । कसैलाई सवारी साधन चढेको केही मिनेटमै सुरु हुन्छ भने कसैलाई घण्टौँ पछि । मोसन सिकनेस भएमा यात्रा साह्रै कष्टकर हुन्छ, त्यो तपाई हामीले भोगेकै कुरा हो ।
तपाई आफ्नो यात्रा सुखदायी र रमाईलो बनाउनका लागि हाम्रै घरको भान्सामा प्रयोग हुने केही प्रभावकारी घरेलु उपाय र औषधीय गुणयुक्त जडिबुटीको बारेमा जानकारी लिने त्यस्ता बस्तु साथमा लिएर हिड्दा फाइदा हुन्छ ।
१) जेठीमधु – यो मधुर र स्निग्ध गुणयुक्त हुने भएकोले आमाशयको अम्लता कम गर्दछ साथै आमाशयको वायुलाई पनि कम गर्दछ । अतः यात्रा गर्दा जेठीमधुका टुक्राहरु मुखमा राखेर चुसीरहनु भयो भने पनि वान्ता हुने समस्या बाट मुत्ती मिल्छ ।
२) ल्वाङ्ग – ल्वाङ्ग मुखमा राखेर चुसीरहँदा पनि वान्ता हुँदैन । यो सुगन्ध तथा ल्वाङ्गमा पाईने राशायनिक तत्वका कारण पनि वान्ता हुने समस्याबाट छुटकारा पाउन सकिन्छ ।
३) जामुन – जामुनको फल तथा यसका पातहरुमा वान्ता रोक्न सक्ने औषधीय गुण हुन्छ । जामुन पत्रको रस निकालेर यात्रा गर्नुपूर्व पिउने वा यात्राको वीच–वीचमा अलि–अलि रस पिउँदा पनि वान्ता हुने समस्याबाट छुटकारा पाउन सकिन्छ । साथै जामुनको फल नै फलफुलका रुपमा प्रयोग गर्न सकिन्छ ।
४) आँपको पात – आँपको पातले वान्ता रोक्ने काम गर्दछ । यसर्थ यात्रा गर्दा आँपको पातको रस निकालेर वीच वीचमा पिउने गर्नु भयो भने पनि वान्ता हुदैन ।
५) सौंफ – सौंफले पनि वान्ता रोक्ने काम गर्दछ । यात्राका क्रममा मुखमा सौंफ राखेर चपाईरहँदा पनि वान्ता हुँदैन ।
६) अदुवा – यो तपाई हाम्रो घरको भान्सामा सधै प्रयोग हुने मसला मध्ये एक हो । रुघा खोकी, अरुची आदिमा प्रयोग गरिने तथा दैनिक भान्सामा प्रयोग हुने अदुवामा वान्ता रोक्ने औषधीय गुण हुन्छ । यात्राका क्रममा अदुवाका टुक्रा मुखमा राखेर चुसीरहँदा पनि मोसन सिकनेस कम हुन्छ ।
यो बाहेक पनि अनार, बयर, बिमिरो आदि यात्राका क्रममा पटक–पटक खाँदा पनि मोसन सिकनेस कम गर्न सकिन्छ ।
त्यसका अलावा पतेना, अदुवा, ल्वाङ्ग मिसाएर अलिकति नुन र सौंफको पाउडर पनि राखी यात्राका क्रममा पटक–पटक पानीका रुपमा प्रयोग गर्दा पनि मोसन सिकनेसलाई धेरै हद सम्म कम गर्न सकिन्छ ।