एजेन्सी । नेपालीहरुले सञ्चालन गर्दै आएको सोसियल इ–कमर्स कम्पनी सगुनले अमेरिकी कम्पनी एक्जेम्प्लर एलएलसीसँग हालै रणनीतिक साझेदारी गरेको छ ।
एक्जेम्प्लर कम्पनीले जारी गरेको प्रेस विज्ञप्तिमा कम्पनीका प्रबन्ध निर्देशक क्याथरिन ब्राण्डले प्रविधिका क्षेत्रमा विद्यमान उद्योग तथा बजारमा नयाँ परिवर्तन ल्याउनसक्ने सोचसहित सगुन संग साझेदारी गरिएको जनाएको छ ।
कम्पनीका अनुसार सगुन एउटा प्रविधिको क्षेत्रमा उच्च सम्भावना बोकेर अगाडी बढीरहेको कम्पनी भएको ठहर गर्दै रणनीतिक साझेदारी गरिएको जारी बिज्ञप्तीमा भनिएको छ ।
सगुनका संस्थापक गोविन्द गिरीका अनुसार भारतमा अनुसन्धान र प्रोडक्ट डिभलेपमेन्ट तथा नेपालमा प्रयोगकर्ता र व्यवसाय वृद्धिका लागि टिम तयार गरी शुरुका दिनदेखि सगुनले काम गरिरहेको बताए ।
अमेरिकामा टिम तयार गर्ने पूर्वयोजनाअन्तर्गत सगुनलाई अन्तर्राष्ट्रिय बजारमा सहज प्रतिस्पर्धा गर्नसक्ने स्तरको प्राविधिक विकास तथा कर्पोरेट तहको व्यवस्थापनमा उच्च गुणस्तरीय योगदान गर्नसक्ने अमेरिकी कम्पनी एक्जेम्प्लरसँग साझेदारी गरिएको गिरीले जानकारी दिए ।
उनका अनुसार एक्जेम्प्लर कम्पनीसँगको साझेदारी सगुनको एउटा रणनीतिक विस्तार हो जसबाट सगुनले कानूनी सेवा, व्यवस्थापन, तेस्रो पक्षीय साझेदारीलगायत पूँजी वृद्धिका क्षेत्रहरुमा अन्तर्राष्ट्रियस्तरको सहयोग प्राप्त गर्नेछ ।
एक्जेम्प्लर कम्पनीका अनुसार सगुनसँग सम्बन्धित यस कम्पनीका समूह सदस्यहरूले क्रिप्टोकरेन्सी, सामाजिक सञ्जाल, इ–कमर्सलगायतका क्षेत्रमा १५ देखि २५ वर्षसम्मको अनुभव प्राप्त गरेका छन् ।
उनीहरूले हार्भड युनिभर्सिटी, एल ए युनिभर्सिटी, थन्डरबर्ड युनिभर्सिटीलगायत अमेरिकाका उच्चस्तरका विश्वविद्यालयबाट उच्च तहको अध्ययन पूरा गरेका छन् । यी टीम सदस्यहरूसँग सगुन जस्तै कम्पनीहरुका लागि १ अर्ब ६० करोड अमेरिकी डलर पूँजी सङ्कलन गरेको छ ।
साथै एक्जेम्प्लर कम्पनीका कार्यालयहरु सिलिकन भ्याली, न्युयोर्क, बोस्टनलगायत अमेरिकाका १० वटा मुख्य शहरमा छरिएर रहेका छन् ।