काठमाण्डौं – नेपालबाट करिब ४ दशक अगाडी चोरी भएको लक्ष्मीनारायण भनिने वसुदेव–कमलाजाको मूर्ति अमेरिकी सरकारले नेपाललाई हस्तान्तरण गरेको छ ।
सन् १९८४ मा नेपालबाट चोरेर अवैधरुपमा अमेरिका पुर्याइएको मूर्ति अमेरिकाका संघीय जाँच आयोग ‘एफबीआई’ उपसहायक निर्देशक टिमोथी एन. ड्युनह्यामले नेपालका राजदूत डा.युवराज खतिवडालाई हस्तान्तरण गरेका हुन् ।
अमेरिकास्थित नेपाली दूतावासमै आयोजित एक विशेष समारोहबीच मूर्ति हस्तान्तरण गरिएको हो । मूर्तिलाई अब युनेस्कोको महासन्धि लगायतका आवश्यक प्रावधान तथा अन्य उचित प्रक्रिया पूरा गरी नेपाल ल्याइने दूतावासले जनाएको छ ।
दूतावासका अनुसार सो मूर्ति पाटनस्थित एक मन्दिरको ऐतिहासिक मूर्ति हो । सो मूर्ति ड्यालस म्युजियम अफ आर्ट्स टेक्सासमा सन् १९९० देखि प्रदर्शनमा राखिएको थियो ।
३३.५ इन्च उचाई र १९.२५ इन्च चौडाई रहेको मूर्तिमा विष्णु र देवी लक्ष्मीलाई प्रतीकात्मकरुपमा देखाइएको छ ।
मूर्ति नेपालको मध्यकालीन अवस्थामा बनेको अनुमान गरिएको छ । मूर्ति ३७ वर्षअघि चोरी गरी अवैधरुपमा अमेरिका पुर्याइएको थियो ।
