गोरखा – नेपालकै ऐतिहासिक, प्राचिन तथा धार्मिक तिर्थ स्थल मनकामना मन्दिर र नेपालकै पहिलो केबुलकार भोली देखी सञ्चालनमा आउदै छ ।
नोबल कोरोना भाइरस (कोभिड–१९)का कारण ०७६ साल चैत्र ८ गतेदेखि बन्द भएको मनकामना मन्दिर र केबुलकार एकै दिनमा सञ्चालनमा आउन लागेको हो ।
मनकामना क्षेत्र विकास समितिको गएको मङ्गलबार बसेको बैठक मंसिर २८ गते आइतबार देखी मनकामना मन्दिर र केबुलकार सञ्चालनमा ल्याउने सहमती गरे संगै जिल्लास्तरीय कोभिड बिपत व्यवस्थापन केन्द्र (सिसिएमसी) बैठकले २५ गते देखी गोरखाका सबै धार्मिक स्थलको निषेधाज्ञा शुक्रबार बिहानै देखी खुल्ला गरेको पछि मनकामना मन्दिर र केबुलकार एकै दिन सञ्चालनमा आउने भएको हो ।
यता गोरखा सदरमुकाममा रहेको गोरखकाली मन्दिर र गोरखनाथ मन्दिर पनि भोली (आइतबार) देखी नै सर्व साधारणको लागि खुल्ला गरिएको छ ।
भोली बिहान नित्य पुजा संगै सर्व साधारणका लागि मनकामना मन्दिर खुल्ला गरिने मन्दिरका मुल पुजारी ईन्सानबहादुर थापाले बताए । ‘पुजारी र भक्तजनको स्वास्थ्य सुरक्षालाई ध्यानमा राखेर तत्कालका लागि मन्दिर बाहिरको झ्यालबाट पुजा सामाग्री पुजारीलाई दिने गरी ब्यवस्था मिलाएको’ भन्दै ‘बलि दिने स्थानमा समेत छुट्टै पुजारीको ब्यवस्था मिलाइको’ पुजारी थापाले भने ।
यता नेपालकै पहिलो मनकामना केबुलकारले पनि सर्व साधारणका लागि यात्रा सहज बनाउन सबै तयारी पुरा भएको नायब महाप्रबन्धक उज्वल शेरचनले बताए । ‘हामीले स्वास्थ्य सुरक्षा मापदण्ड एसपिओ पालना गर्दै केबुलकार सञ्चालनमा ल्याउने निर्णय गरेका हौ’ भन्दै ‘यात्रुको १०० डिग्री फरेनहाइट ज्वरो देखिएमा, रुघाखोकीको लक्ष्यण देखिएका कुनै पनि यात्रुलाई केबुलकार यात्रामा प्रतिबन्ध लगाइएको’ उनले भने ।
यात्रुले लाइनमा बस्दा भौतिक दुरी कायम गनुपर्ने, केबुलकार प्रवेश गर्ना साथै स्वचालित ह्याण्ड स्यानिटाइजर वा साबुनपानीले हात धुनुपर्ने, भिडभाड गर्न र केबुलकार परिषर भित्र बनभोज समेत खान प्रतिबन्ध लगाएको मनकामना दर्शन प्रालिले जनाएको छ ।
यात्रुकै स्वास्थ्य सुरक्षामा ध्यान दिदै केबुलकारले प्रति धण्टा ३३० जना यात्रुलाई मात्र यात्रा गराउन लागिएको छ । यस अघि प्रति घण्टा ६६० जनाले यात्रा गर्दै आएका थिए ।
स्वास्थ्य सुरक्षालाई विशेष महत्व दिएको केबुलकार प्रशासनले आफ्नो कर्मचारीलाई फेस सिल्ड र माक्स जस्ता सुरक्षा सामाग्रीको प्रबन्ध गरेको छ । ‘हामीले कर्मचारी मात्र होइन दैनिक रुपमा केबुलकार र परिषलाई डिसइन्फेक्सन गर्ने तयारी पुरा गरेका छौ’ सञ्चालक मध्येका एक राजेशबावु श्रेष्ठले बताए ।
मनकामना मन्दिर र केबुलकार चैत्र ८ गते देखी बन्द गरिएको थियो । मन्दिर र केबुलकार २६७ दिन पछि मात्र सञ्चालनमा आउन लागेको हो ।