गोरखा समाचारदाता
गोरखा – गोरखामा साउदी र ओमनबाट आएका ३ जनामा कोरोना पुष्टी भएको छ ।
जिल्लाको पालुङटार नगरपालिका र भीमसेन थापा र शहिद लखन गाउँपालिकाका ३ जनामा कोरोना पुष्टी भएको हो । यो सहित गोरखामा कोरोना संक्रमणबाट संक्रमित हुनेको संख्या १०५ पुगेको छ ।
प्रदेश स्वास्थ्य निर्देशनालयले दिउसो ४ बजे एक सूचना जारी गर्दै गोरखाको ३ स्थानिय पालिकाका ३ जना पुरुषलाई कोरोना पुष्टी भएको जनाएको छ ।
पोखरा स्वास्थ्य बिज्ञान प्रतिष्ठानमा गरिएको पिसिआर परिक्षणका क्रममा पालुङटार नगरपालिका ५ ठाँटीपोखरीका २९ बर्षिय पुरुषमा कोरोना पुष्टी भएको छ । साउदीबाट आएका उनी असार २१ गते धर्मावती प्रावि हवाई ग्राउण्डमा रहेको क्वारिन्टीनमा बस्दै आएको स्वास्थ्य शाखा प्रमुख कृण्ण अधिकारीले बताए ।
त्यस्तै गरी साउदीबाट आएका शहिद लखन गाउँपालिका ३ मनकामनाका २५ बर्षिय पुरुषमा पनि कोरोना संक्रमण पुष्टी भएको छ । उनी असार १७ गते नै गाउँपालिकाले मनकामना माविमा बनाएको क्वारिन्टीनमा बस्दै आएको स्वास्थ्य शाखा प्रमुख बिरेन्द्र श्रेष्ठले बताए ।
यता ओमानबाट आएका २८ बर्षिय पुरुषमा पनि कोरोना पुष्टी भएको छ । भीमसेन थापा गाउँपालिका ६ अश्राङका उनी असार २७ गते जनशक्ति आधारभूत बिद्यालयमा बनाईएको क्वारिन्टीनमा बस्दै आएकाको पालिकाका स्वास्थ्य प्रमुख भेषराज खनालले बताए ।
संक्रमित ३ जनालाई नै जिल्ला स्थित गोरखा क्याम्पसमा रहेको आइसोलेशन कक्षमा ल्याउने तयारी भईरहेको स्वास्थ्य कार्यालय गोरखाका सूचना अधिकारी राजुरमण न्यौपानले बताए ।
