गोरखा समाचारदाता
काठमाण्डौं – आजबाट ५ दिन देशभर वर्षाको सम्भावना रहेको छ ।
जल तथा मौसम विज्ञान विभागका अनुसार वर्षाले बाढी पहिरो आउन सक्ने भएका कारण जोगिन समेत आग्रह गरेको छ ।
जल तथा मौषम पुर्वानुमान महाशाखाले पहाडी क्षेत्रका केही स्थानमा पहिरो र तराईका धेरै स्थानमा बाढी तथा डुबानको सम्भावना रहेको भन्दै अरु बेला भन्दा बढी सर्तन रहन आग्रह गरेको छ ।
त्यस्तै गरी राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि सबै सर्व साधारणहरुलाई अलि बढी नै सतर्क रहन अनुरोध गरेको छ ।
पहाडी भू भागका स साना नदी नालामा समेत आकस्मिक बहाव बढ्ने सम्भावना भएकाले जनधनको क्षति हुन सक्ने अनुमान गरिएको छ ।
बर्षाका कारण कन्काई, सप्तकोसी, कमला, वाग्मती, नारायणी, भेरी–बबई र पश्चिम राप्तीमा बाढी आउने भन्दै गृह मन्त्रालयले तटीय क्षेत्रमा बस्नेलाई सुरक्षित स्थानमा जान भनेको हो ।
प्रदेश १, २, वाग्मती, गण्डकी र प्रदेश ५ का जिल्ला हुँदै बग्ने ठूला तथा सहायक नदीमा पानीको सतह बढ्ने र यसले बाढी र डुबानको जोखिम निम्त्याउने पूर्वानुमान छ । प्रदेश २ का ८ वटै जिल्ला डुबानको उच्च जोखिममा छन् ।
यस वर्ष मनसुन सुरु भएयता जेठ ३० देखि साउन २ गतेसम्म बाढीपहिरो र डुबानबाट १०९ जनाको ज्यान गई सकेको छ । जसमध्ये पहिरोबाट १०४ को ज्यान गएको थियो भने ४३ बेपत्ता तथा बाढी र डुबानबाट ५ को ज्यान गएको र ५ बेपत्ता भएका छन् ।
यो अवधिमा चट्याङबाट मात्रै १७ जनाले ज्यान गुमाएका छन् ।
यता गण्डकी प्रदेश सरकारले भने परासी, बर्दघाट, डण्डाबजार र नवलपरासीको धेरै स्थानमा भारी बर्षा मापन गरिएको भन्दै आरुणखोला, गिरुवारी खोला र नवलपरासीको साना नदी तटीय क्षेत्रमा एक्कासी बाढी आउन सक्ने भन्दै सर्व साधारणहरुलाई मोबाईल मार्फत सन्देश पठाएर सूचित गरेको छ ।