एजेन्सी – विश्व स्वाथ्य संगठन (डब्लुएचओ)ले कोरोना भाइरसको विश्वव्यापी महामारी थप खराब र भयावह बन्दै जाने चेतावनी दिएको छ ।
विश्वका धेरै सरकारहरु प्रभावकारी प्रयास गर्न असफल भएको भन्दै संक्रमण अझै फैलने डब्लुएचओले चेतावनी दिएको हो ।
डब्लुएचओका महानिर्देशक टेडरोज आध्यनोम धेरै देशहरु कोरोना नियन्त्रणको खराब दिशामा गइरहेको भन्दै चिन्ता समेत जनाएका हुन् । जेनेभामा आयोजित पत्रकार सम्मेलनमा डब्लुएचओका महानिर्देशक डा. टेडरोजले सबै राष्ट्र प्रमुखले समान खालको रणनीति नअपनाउँदा समस्या उत्पन्न भएको बताएका हुन् ।
विश्व राष्ट्र प्रमुखहरुबाट आउने फरक खालका सन्देश वा भनाईले महामारी नियन्त्रणमा लिने प्रयासमा सव–साधारणको विश्वास टुटेको उनको भनाइ छ । भौतिक दूरी, हात धुने तथा मास्क लगाउने सहितका उपायहरु प्रभावकारी रुपमा कार्यान्वयन हुनु पर्ने उनले बताए । उनले निकट भविष्यमा विश्व पुरानै सामान्य अवस्थामा फर्किने सम्भावना नदेखिएको पनि स्पष्ट पारे ।
आधारभूत नियमहरु मानिएन भने यो महामारी निरन्तर रहने छ र थप खराब र भयानक हुने उनको चेतावनी छ । संक्रमण रोक्न वा नियन्त्रणमा लिन प्रभावकारी हुने भनेर प्रमाणित भएका उपायहरु बेवास्ता गर्ने देशहरुमा संक्रमण फैलदो क्रममा रहेको उनको भनाइ छ ।
पछिल्लो समयमा उत्तर र दक्षिण अमेरिकामा संक्रमण फैलदो क्रममा देखिएको छ । विश्वभर कोरोना भाइरसबाट संक्रमित हुनेको संख्या १ करोड ३२ लाख ४१ हजार भन्दा बढी पुगेको छ । यस्तै अहिलेसम्म ५ लाख ७५ हजार ६ सय भन्दा धेरैले ज्यान गुमाई सकेको छ ।
