गोरखा समाचारदाता
काठमाण्डौं – राजधानीको गंगालाल अस्पतालको आकस्मिक बाहेकको सबै सेवा बन्द गरिएको छ ।
अस्पतालमा उपचार गराइरहेका विरामीमा कोरोना भाइरस संक्रमण देखिएपछि बाँसबारीस्थित शहीद गंगालाल हृदय केन्द्र अनिश्चितकालका लागि बन्द गरिएको हो ।
अस्पतालले आज सूचना जारी गरेर आकस्मिक बाहेकका सेवा स्थगित गरिएको जनाएको छ ।
साथै उपचारमा सग्लन सबै चिकित्सक र स्वास्थ्यकर्मीलाई आइसोलेसनमा बस्न समेत अस्पतालले भनेको छ । विरामीको सम्पर्कमा आएका सबैको स्वाब संकलन गरेर परीक्षणका लागि पठाउने तयारी गरिएको छ ।
सोमबार अस्पतालमा उपचार गराइरहेका ७ जना विरामीमा कोरोना भाइरस संक्रमण पुष्टि भएको थियो ।संक्रमण पुष्टि भएका सबैलाई बलम्बुस्थित सशस्त्र प्रहरी अस्पतालको आइसोलेसनमा पठाइएको छ ।
सरकारले लक्षण नदेखिएका भए पनि अपरेसनअगाडि कोरोनाको जाँच गर्न परिपत्र जारी गरेपछि अस्पतालले विरामीको स्वाब संकलन गरेर परीक्षणका लागि पठाएको थियो ।
२० जना विरामीको स्वाब परीक्षणका लागि पठाउदा ७ जनाको पीसीआर रिपोर्ट पोजेटिभ आएको थियो ।
