गोरखा समाचारदाता
गोरखा – नोबल कोरोना भाइरस (कोभिड–१९)बाट संक्रमित ८ जनालाई उपचार पछि घर पठाईएको छ ।
गोरखा अस्पतालमा उपचाररत गोरखा र काभ्रेका गरी ८ जनालाई आज घर पठाईएको हो ।
गोरखा अस्पतालले आज (सनिबार) एक सूचना जारी गर्दै गोरखा अस्पतालको आइसोलेशनमा उपचाररत ८ जनालाई घर पठाएको पुष्टी गरेको छ ।
उपचार पछि घर जानेहरुमा काभ्रे जिल्ला पाँचखाल ९ घर भएका २० बर्षका पुरुष र गोरखा जिल्ला पालुङटार नगरपालिका ७ का १७ बर्षिय पुरुष १ जना, गण्डकी गाउँपालिका ८ का ३०, २०, ३२ र ४३ बर्षका ४ जना पुरुष र भीमसेन थापा गाउँपालिका ५ र ६ घर भएका १/१ जना पुरुष गरी ८ जनालाई आज बिदाई गरीएको गोरखा अस्पतालका सूचना अधिकारी कृण्ण ढकालले बताए ।
गोरखा अस्पताल द्वारा जारी सुचनामा ‘राष्ट्रिय जनस्वास्थ्य प्रयोगशाला काठमाण्डौं, शुक्रराज ट्रपिकल एन्ड इन्फेक्सियस डिजिज हस्पिटल काठमाण्डौं र प्रदेश जनस्वास्थ्य प्रयोगशाला पोखराबाट कोभिड–१९ रिर्पोट नेगेटिभ आएको र १४ दिन आइसोलेशनमा बसी उपचार पुरा गरेकाहरुलाई डिस्चार्ज गरिएको’ भनिएको छ । साथै अस्पताल प्रशासनले ‘ब्यवस्थापनमा खटिनुहुने चिकित्सक, स्वास्थ्यकर्मी तथा सहयोग गनुहुने ब्यवस्थापन समिति, पत्रकार, सुरक्षाकर्मी सम्पूर्णलाई धन्यबाद’ दिएको छ ।
अब भने गोरखा अस्पतालको आइसोलेशनमा १६ जनाले उपचार गरिरहेका छन् । कोरोना संक्रमण भएर उपचार पछि घर फर्किएको यो नै गोरखाको पहिलो समूह हो ।
