गोरखा समाचारदाता
गोरखा – गोरखा क्याम्पस हाता भित्र आइसोलेशन वार्ड निर्माणको काम थालनी भएको छ ।
जिल्लामा रहेको नेपाली सेनाको टोलीले १०० वेडको आइसोलेशन वार्ड निर्माण कार्यको थालनी गरेको हो ।
गोरखा नगरपालिका ५ को हिलेपोखरीमा रहेको गोरखा क्याम्पस भित्रको हाता भित्र रहेको भवनमा आइसोलेशन निर्माणको काम थालनी भएको रण सिंह दल गणका गणपती उज्वल केसीले बताए । ‘कमाण्ड पोष्टले आइसोलेशन निर्माण गर्ने जिम्मा हामीलाई दिएकोले कामको थालनी गरेको’ उनले बताए ।
क्याम्पस परिषरमा आइसोलेशन वार्ड सञ्चालन गर्ने बिषयमा छलफल गर्दै स्थानिय
कोरोना भाइरस (कोभिड–१९)को रोकथाम, नियन्त्रण र ब्यवस्थापनको लागि गठित गोरखा जिल्ला स्तरीय कमाण्ड पोष्टले मंगलबार गोरखा क्याम्पसमा आइसोलेशन बनाउन ठाउँ उपयुत्त भएको भन्दै नेपाली सेनाको रण सिंह दल गणलाई निर्माणको जिम्मावारी दिए पछि गणले बुधबारबाट कामको थालनी गरेको हो ।
गणका १०० भन्दा बढी जवानहरुले भवन वरपर सरसफाई गर्नुका साथै, अस्थायी शौचालय निर्माण र भवनको सरसफाई सकेको छ । भवनको सुरक्षार्थ बुधबार देखी नै नेपाली सेनाको एक टोली उत्त भवनमा बसी सकेको छ ।
क्याम्पसको शिक्षा र विज्ञान भवन गरी ३ वटा भवनलाई प्रयोगमा ल्याईने भएको छ । आइसोलेशन भने विज्ञान भवनमा मात्र बन्ने छ । अन्य २ भवनमा भने एउटामा सुरक्षाकर्मी र अर्कोमा भान्साको लागि प्रयोग गरिने भएको छ ।
अहिले सो भवनमा ईन्टरनेट, बिद्युत र आइसोलेशनका लागि वेड स्थापनाको काम भई रहेको कमाण्ड पोष्टले जनाएको छ । कमाण्ड पोष्टले मंगलबार नै गोरखा अस्पतालमा २५ वेड, आरुघाट, आँपपिपल, मकैसिङ र जौबारीमा १०/१० वेडको आइसोलेशन निर्माण गर्ने निर्णय गरि सकेको छ ।
