पोखरा- विश्वको पहिलो महिला क्लब लायन्स क्लब अफ पोखरा गण्डकीले लोकगायिका प्राज्ञ हरिदेवी कोइरालालाई गण्डकी नारी सम्मान–२०७७ प्रदान गरेको छ ।
लकडाउनमा भर्चुअल प्रविधिको प्रयोग गरेर २५ हजार रुपैयाँसहित सम्मान गरिएको क्लबका अध्यक्ष हीरा भट्टराईले जानकारी दिनुभयो ।
अहिलेको अवस्थामा जमघट गरेर कार्यक्रम गर्न सम्भव भएन, त्यसैले क्लबका सदस्य र लिडरहरुको भर्चुअल उपस्थितिमा सम्मान गरेका हौँ ।उहाँले क्लबको सातौँ सम्मान रहेको र हरेक वर्ष विभिन्न क्षेत्रमा योगदान पु¥याएका एक महिलालाई नगदसहित सम्मान गर्दै आएको जानकारी दिनुभयो ।
भट्टराईले सम्मानपत्र पढेर सुनाउनुभएको थियो ।
सम्मान कार्यक्रममा लायन्स क्लब अफ ३२५ बी–१ का गभर्नर इन्दु लम्सालले समय परिस्थिति अनुकूल नहुँदा पनि प्रविधिको प्रयोगमार्फत निरन्तरता दिएर सम्मान कार्यक्रम गर्नु सराहनीय भएको बताउनुभयो ।
शब्दद्वारा सम्मान व्यक्त गर्दै उहाँले लोकगायिका कोइरालाले नेपाली लोक संस्कृतिको विकासमा पुर्याएको योगदानको चर्चा गर्नुभएको थियो ।
पूर्वगभर्नर धनराज आचार्यले समाजका हरेक गतिविधिमा सक्रिय महिला क्लबले कोरोनाबीच पनि फरक ढङ्गले सम्मान कार्यक्रम गरी उदाहरणीय कार्य गरेको बताउनुभयो ।
सम्मानित लोकगायिका कोइरालाले कोरोनाबीचको सम्मान जीवनकालको विल्कुल फरक र अविस्मरणीय रहेको धारणा राख्नुभयो ।
सम्मानले लोक संस्कृति विकासमा निरन्तर लाग्ने प्रेरणा मिलेको उहाँको भनाइ थियो ।
क्लबका ५५ सदस्य र आमन्त्रित व्यक्तित्वसहित भर्चुअल कार्यक्रममा को–चिफ एडभाइजर सुचित्रा थापा, लायन इन्दिरा बराल, शारदा पराजुली, साधना चालिसेलगायतले सम्मानित व्यक्तिलाई शुभकामना दिनुभएको थियो ।
